Oǵan atalǵan komıtet tóraıymy Birǵanym Áıtimova bastaǵan Senat depýtattary, Eńbek jáne halyqty áleýmettik qorǵaý vıse-mınıstri Nurjan Áltaev, jergilikti atqarý organdarynyń basshylary qatysty. Otyrysta baıandama jasaǵan Eńbek jáne halyqty áleýmettik qorǵaý vıse-mınıstri Nurjan Áltaev jyl basynan beri respýblıka boıynsha mártebesi anyqtalmaǵanyn 2,7 mıllıon adam bolǵanyn, búginge deıin sonyń 607 myńynyń mártebesi anyqtalǵanyn aıtty.
Senattyń kóshpeli májilisine qatysqan oblys ákimi Arhımed Muhambetov turǵyndardyń ózin ózi jumyspen qamtý barysynda Qostanaıda jasalyp jatqan, ásirese, olardy bızneske tartý isine toqtalyp ótti. Oblys ákiminiń orynbasary Marat Júndibaev turǵyndardyń ózin ózi jumyspen qamtýy úshin túrli baǵytta jumystar júrgizilip jatqanynan habardar etti.
«Qostanaı oblysynda beıresmı jumyspen qamtylǵan azamattardyń mártebesin anyqtaý, formalızasııalaý qyzý júrgizilip jatyr. Jyl basynda beıresmı jumys isteıtin 133,2 myń adamnyń mártebesi anyqtalmaǵan edi, qazir olardyń 31,1 myńy memlekettik organdardyń málimet bazasyna tirkeldi. Osylardyń arasynda jaldamaly jumys isteıtin 12000 adamǵa jumys berýshiler zeınetaqy jarnasyn aýdara bastady» dedi oblys ákiminiń orynbasary Marat Júndibaev. Osyndaı sharalar atqarylsa da, oblys óńirinde áli de mártebesi anyqtalmaǵan 14,8 myń adam bar. Selolyq okrýgterde jumyssyzdarmen jáne ózin ózi jumyspen qamtyǵandarmen olardyń mártebesin belgileý jóninde áńgimeler júrgiziledi, túsindiriledi.
Kóshpeli otyrysty Áleýmettik-mádenı damý jáne ǵylym komıtetiniń tóraıymy Birǵanym Áıtimova qorytyndylady. Qazir «Beıresmı jumyspen qamtylǵandardyń qyzmetin zańdastyrý máseleleri boıynsha, Qazaqstan Respýblıkasynyń keıbir zańnamalyq aktilerge ózgerister engizý týraly» tıisti Zań jobasy ázirlenýde. Atalǵan Zań jobasynda jumyspen qamtylǵandardyń jáne ózin ózi jumyspen qamtyǵan halyqtyń birińǵaı túsinigi men olardyń sanattary anyqtalady.
Názıra Járimbet,
«Egemen Qazaqstan»
Qostanaı
