Májilistiń negizgi taqyryby – qazaq tiline aýdarylǵan jańa oqýlyqtardy ázirleý barysyn, ǵylymı mazmunyn talqylaý. Tarıh, fılosofııa, psıhologııa, antropologııa, mádenıettaný, dintaný, lıngvıstıka salalary boıynsha ázirlengen oqýlyqtardyń ǵylymı redaktorlarynyń baıandamalarynda atalǵan oqýlyqtardy oqý baǵdarlamasyna engizýdiń basymdyqtary aıtyldy.
Baıandamalardy talqylaý barysynda sarapshylar bilim berý júıesiniń básekege qabilettiligin kóteretin jobalardy engizýge mán berýdi, elimizdiń bilim berý salasyn oqý-ádistemelik materıaldarmen qamtamasyz etýdiń tujyrymdamasyn qaıta qaraýdy usyndy.
«Álemdik deńgeıde tanymal oqýlyqtardy qazaq tiline tikeleı aýdarý barysynda ulttyq jadyny da esten shyǵarmaý qajet. Qazirgi ýaqytta «Jańa gýmanıtarlyq bilim. Qazaq tilindegi 100 jańa oqýlyq» jobasy aıasynda eki baǵytta jumys istegen abzal. Birinshiden, atalǵan oqýlyqtardy aýdarý esebinen álemdik standarttar deńgeıine jetýimiz qajet. Ekinshiden, bizge ulttyq jadymyzdy saqtap qalý mańyzdy. О́ıtkeni jaratylystaný ǵylymynda ult joq. Bıologııa, fızıka, hımııa syndy salalardaǵy kitaptardy erkin aýdarýǵa bolady. Al qoǵamdyq-gýmanıtarlyq ǵylymǵa kelgende bizdiń ulttyq qundylyqtarymyzdy, salt-dástúrimizdi, ulttyq jadymyzdy eskerýimiz qajet», dedi Ulttyq ǵylym akademııasynyń akademıgi Bolat Kómekov.
Oqýlyqtardy aýdarý jumysyna belsene aralasqan fılologııa ǵylymdarynyń doktory Sherýbaı Qurmanbaıuly oqýlyqtardy aýdarý barysynda paıda bolǵan máseleler men suraqtarǵa toqtalyp, termın aýdarý barysynda ártúrli pikirler men daýdyń bolǵanyn aıtty. «Ǵylym úshin kásibı pikirtalastar paıdaly. Ol jetilýge, ósýge kómektesedi. Shyny kerek, oqýlyqtardy aýdarý barysynda qazaq tilinde sóılem quraý qıyndyq týdyrǵan joq. Negizinen uǵymdar men termınderdiń qazaqsha balamasyn tabý aýyr boldy. Bir termın úshin eki-úsh kún pikirlesý, talqylaý boldy. Týra maǵynasynda aýdarmashylar kúni-túni jumys istedi. Bul úlken eńbek. Gýmanıtarlyq ǵylymdardyń oqýlyqtary, onyń ishinde til bilimine baılanysty kitaptar stýdentter úshin de, oqytýshylar úshin de paıdaly bolady», dedi Sherýbaı Qurmanbaıuly.
Sarapshy-ǵalymdar jańa oqýlyqtardy elimizdiń barlyq joǵary oqý oryndaryna beıimdeýdi jedeldetýdiń, olardy oqý úderisinde qoldaný boıynsha praktıkalyq semınarlardy ótkizýdiń qajettiligin basa aıtty.
Baǵashar TURSYNBAIULY,
«Egemen Qazaqstan»
