Gúlshara Ábdiqalyqova quttyqtaý sózinde Elbasy Nursultan Nazarbaevtyń «Jańa gýmanıtarlyq bilim. Qazaq tilindegi 100 jańa oqýlyq» jobasy aıasyndaǵy alǵashqy 18 oqýlyqtyń tanystyrylymynda aıtqan: «Jańa oqýlyqtar – eksklıýzıvti gýmanıtarlyq kitaphana. Ol barlyq adam úshin úsh formatta qoljetimdi bolady: ádettegi qaǵaz kitaptar túrinde, elektrondy onlaın-nusqada jáne úzdik lektorlardyń vıdeoteka formatyndaǵy ashyq dáristeri túrinde», – degen sózin atap ótti.
Memlekettik hatshy bul eleýli mádenı is-shara Qazaqstan elordasynyń 20 jyldyǵymen tuspa-tus ótip jatqanyna toqtaldy. Búginde Astana megapolısi – eldiń ulttyq sımvoly ǵana emes, sondaı-aq, Eýrazııanyń moıyndalǵan ortalyqtarynyń biri.
– Jahandaný jáne sıfrlyq tehnologııalar ǵasyrynda kitap burynǵysha jańa bilimniń qaınar kózi bolyp qala beredi. Ol búkil bolmysty tanyp-bilýdiń ǵalamat quraly bolyp tabylady, – dedi Memhatshy.
Qazaqstannyń táýelsizdigi jyldarynda jalpy taralymy 400 mıllıon bolatyn 81 myńǵa jýyq kitap shyǵaryldy. Tek 2010 jyldan beri ǵana kitap basýǵa 10 mıllıard teńgeden astam qarajat bólingen. Búginde 380 kompanııa baspagerlik qyzmet kórsetýde.
Bıyl kórmege álemniń 18 memleketinen 155 kompanııa men uıym ókilderi qatysýda. Olardyń arasynda reseılik «Naýka», Polshadan kelgen «Kurtiak and Ley Artistic Publishing House» jáne basqa da belgili baspalar bar. Sondaı-aq, 120-ǵa jýyq mádenı-iskerlik is-sharalar ótkiziledi.
Memlekettik hatshy G.Ábdiqalyqova «Eurasian Book Fair – 2018» kórme-jármeńkesine qatysý barysynda kórmege qoıylǵan kitaptardyń ekspozısııasymen tanysyp, barlyq qatysýshylardyń shyǵarmashylyq jáne iskerlik baılanysty tereńdete túsýine, tańdaǵan salada zor tabysqa jetýlerine tilektestik bildirdi.
