Degenmen barlyǵynyń basyn qosatyn osy mereke ol úshin ózinshe bir mektep, tipti ýnıversıtet sııaqty. Mereke kúni ol mysaly, ázerbaıjan zamandasymen erkin áńgimelesip, bir óńirde birge ómir súrip jatqan ultty tereń tanı túsýge múmkindik alady.
Ońtústik Qazaqstan oblysy Arys qalasynda týyp-ósken Annanyń qazaq tilinde erkin sóıleıtinine eshkim tańǵala qoımas. Qazaq kórshilerimen tatý otbasyndaǵy oıyn balasynyń tildi meńgerýine aýlada birge oınaǵan balalardyń yqpal etkeni anyq. Oıyn kezinde sary qyz kórshileriniń balalaryn orysshaǵa úıretse, óz kezeginde olar munyń qazaqshasyn jetildirdi. Aýla «dárisiniń» mektepte kómegi kóp tıdi. Odan keıin Anna túrli olımpıadalarǵa qatysyp, júldeli oryndardan kórindi.
Memlekettik tilde erkin sóıleıtin ony túrli konferensııalarǵa, is-sharalarǵa shaqyratyndar da kóbeıdi. «Mektepten keıin kolledj ben ýnıversıtetti qazaq tilinde bitirdim. Meniń qazaq tilin bilýim taǵdyryma erekshe áser etti. Jergilikti telearna qyzmetke shaqyrdy. Maqalalardy qazaq tilinde jaza bastadym, til baılyǵymdy molaıttym. Aýdan ákimdiginde mádenıet jáne tilderdi damytý bóliminde istegen eki jylda kóp nárseni úırendim», deıdi búginde ulttyq arnanyń Ońtústik Qazaqstan oblystyq bólimshesi «Ońtústik» telearnasynyń dıktor-redaktory Anna Sholgına. Gazet-jýrnaldardy memlekettik tilde oqıtyn Anna aǵylshyn tilin de meńgerýde. Kóp til bilýge Elbasy N.Nazarbaevpen kózbe-kóz sóılesip, júzdesýi de septigin tıgizgen.
Iá, ótken jyly Memleket basshysy Ońtústik Qazaqstanǵa jumys sapary barysynda Qazaqstan halqy Assambleıasynyń oblystyq ǵımaraty aldynda boı kótergen «Qazaq eline myń alǵys!» monýmentin kórdi. Mine, sol kún Annanyń búgingideı kóz aldynda. «Elbasymen kezdesýde alǵan áserimdi aıtyp jetkizý múmkin emes. Memleket basshysymen júzdesý kez kelgen janǵa buıyra bermeıtin qýanyshty sát! Qatty qobaljyǵanym ras. Biraq Elbasyn kórgen sátte boıym jeńildep sala berdi.
О́zgeshe aýrany, jylylyqty sezindim. Ashyq ta qarapaıym jan, tez til tabysady. Memleket basshysymen úsh tuǵyrly til jóninde áńgimelestik. Ol kisi talaptansań úsh tilmen shektelmeı kóp til bilýge bolatynyn, sol arqyly múmkindiktiń molaıatynyn aıtty. Kóp ultty memleketimizdegi túrli ulttar men ulystar ókilderiniń dostyǵy táýelsiz Qazaqstannyń basty baılyǵy ekenin atap ótti. Elbasymen kezdesý meni jigerlendirdi, erekshe bir sezim men erteńge degen senim syılady. Izdeniske, bilimge burynǵydan da kóp mán bere bastadym», deıdi A.Sholgına.
Anna úshin de Ońtústik Qazaqstan oblysynda turatyn, birligi jarasqan 100-den astam etnostyń ókilderi úshin de bul merekeniń orny erek. Kóptegen ulttyń ortaq shańyraǵyna aınalǵan qazaq eli álemge beıbitshilik, kelisim men tatýlyqty úlgi etip otyr. «Qazaq halqy jaratylysynan qushaǵy ashyq, jany jomart, qonaqjaı jurt ekeni barshaǵa aıan. Ultymyzdyń osynaý uly qasıetin Elbasy Nursultan Nazarbaev basty baǵdar etip belgilep, dara ustanym etip jarııalady.
Bul jóninde Prezıdent: «Táýelsizdigimizdi tuǵyrly, memleketimizdi ǵumyrly etý – bizdiń ortaq múddemiz. Damý jolymyzda táýelsizdiktiń jalǵyz tiregi birlik ekenin esh ýaqytta umytpaýymyz kerek» dep, jalpyulttyq birlik pen qoǵamdyq kelisimdi – táýelsizdigimizdiń basty tuǵyry etip qalady. Búginde oblystyq 20 etnomádenı birlestik halqymyzdyń baıyrǵy meımandostyq, baýyrlastyq, eńbekkerlik syndy asyl dástúrlerin úzdiksiz jalǵap keledi. Birlikti nyǵaıtatyn, dostyqqa úndeıtin merekede barlyq etnomádenı birlestikter bir úıdiń balasyndaı qýanyshyn bólisip, erteńin josparlaıdy. Mereke maǵan sonysymen de qymbat», – deıdi Anna Sholgına.
Túrli etnostyń basyn biriktirip qana qoımaı, olardy ortaq maqsatqa uıystyryp otyrǵan Ońtústik halqynyń úshten birin jas býyn ókilderi quraıdy. Biz áńgimelegen Anna Sholgına solardyń biri. Aıta ketelik, qazaqstandyq patrıotızm men jalpyulttyq birlik qaǵıdattaryn óskeleń urpaqtyń boıyna sińirý, sol arqyly qazaqstandyq qoǵamnyń jańa formasııasy – ulttyq biregeılikti qalyptastyrý maqsatynda joǵary jáne orta arnaýly oqý oryndarynda 93 Dostyq klýby jumys isteıdi. Klýbtyń uıytqy bolýymen ótkiziletin stýdent jastarmen erkin formattaǵy kezdesýler, ashyq áńgimeler, bıznes-trenıngter, pikir almasý alańdary, sheberlik sabaqtary syndy is-sharalardyń da el birligin nyǵaıtýda bereri mol.
Ǵalymjan Elshibaı,
«Egemen Qazaqstan»
