Kezekti konferensııaǵa Qazaqstan fýtbol federasııasynyń prezıdenti Ádilbek Jaqsybekovten bastap, bas hatshy Azamat Aıtqojın, ulttyq qurama jattyqtyrýshysy Stanımır Stoılov jáne el fýtbolynyń barlyq atqaminerleri men aımaqtyq fýtboldyń ókilderi qatysty.
Alqaly jıynnyń shymyldyǵyn Ádilbek Jaqsybekov ashyp, qazaqtyń dańqty fýtbolshysy bolǵan Tımýr Segizbaevtyń rýhyna qurmet kórsetip, bir mınýt eske alýmen bastady.
– Tımýr Sanjarulynyń esimi el fýtbolynyń tarıhynda altyn áriptermen máńgilikke jazylyp qalady. Aldaǵy ýaqyttarda ony eske alýǵa baǵyttalǵan ártúrli jobalardy qolǵa alamyz – dedi ol.
Sondaı-aq Á.Jaqsybekov jıynǵa qatysqan áriptesteri men búkil qazaq fýtbolynyń jankúıerlerin Qazaqstan fýtboly kúnimen quttyqtady. Osydan týra 16 jyl buryn Qazaqstan mańyzdy qadam jasap, Eýropa fýtbol qaýymdastyqtarynyń odaǵyna (ÝEFA) qabyldanǵan-dy. Osy ýaqyt aralyǵynda Qazaqstan fýtboly Eýropa týrnırlerinde aıtarlyqtaı tabystarǵa qol jetkizdi.
Qazaqstan fýtbol federasııasynyń bas hatshysy Azamat Aıtqojınniń paıymdaýynsha, «Alǵa, fýtbol! Alǵa, Qazaqstan!» baǵdarlamasy el fýtbolyn jańa deńgeıge kóterip, oıynshylardyń deńgeıin jaqsartýǵa kómektese-di. Sondaı-aq atalǵan baǵdarlamany daıyndaýǵa otandyq fýtbol mamandarymen qatar, birneshe sheteldik tanymal fýtbol sarapshylary atsalysqanyn atap ótti.
«Bul baǵdarlama Qazannyń «Rýbıni» men Almatynyń «Qaıratynyń» quramynda 10 jyldan asa dop tepken Pavel Cherepanov basqaratyn jumys toby jáne Qurban Berdıevtiń belsendi qatysýymen daıyndaldy. Sonymen qatar biz Eýropa elderiniń, onyń ishinde Germanııa, Italııa, Ispanııa jáne basqa da federasııalardyń ádistemeleri men baǵdarlamalarymen tanysyp shyqtyq», dedi A.Aıtqojın.
Sonymen qatar Aıtqojın el fýtbolyn damytý úshin aldymen jasóspirimder men balalar fýtbolyn damytý kerektigin jáne óńirlerdegi fýtbol ortalyqtaryn jetildirý qajettigin aıtty. «Federasııa aýyldyq jerlerde fýtbolmen shuǵyldanatyn búkil qazaqstandyqtarǵa monıtorıng jasady. Qazirdiń ózinde 200 myńnan asa bala tirkelgen. Sondaı-aq 2022 jylǵa deıin búkil mektepterde arnaıy fýtbol sabaqtary ótetin bolady. Qazirdiń ózinde 203 mektepte fýtbol sabaqtary ótip jatyr», dedi A.Aıtqojın.
Konferensııa aıasynda sharaǵa qatysýshylar «Alǵa, fýtbol! Alǵa, Qazaqstan!» baǵdarlamasyna óz usynystary men pikirlerin aıtyp, federasııanyń atqarýshy komıtetine jańa músheler saılady.
Álı BITО́RE,
«Egemen Qazaqstan»
