Memleket Basshysy Nursultan Nazarbaevtyń «Bolashaqqa baǵdar: Rýhanı jańǵyrý» maqalasynyń jaryq kórgenine 1jyl tolýyna oraı ótkizilgen ádebı shara aıasynda «Máńgilik eldiń muraty» atty oblystyq baıqaýdyń jeńimpazdary marapattalyp, úzdik shyǵarma avtorlaryna «Aq qaýyrsyn» ádebı júldesi tapsyryldy. Sondaı-aq, osy kúni «Rýh» baıqaýynyń qorytyndysy boıynsha jaryqqa shyqqan kitaptardyń tusaýy kesilip, Jazýshylar odaǵyna múshelikke qabyldanǵan bir top jas qalamgerge kýálik tabys etildi.
Eki kúnge sozylǵan «Jetisý kóktemi» oblystyq forýmy aıasynda jas qalamgerler Qarasaı aýdanyndaǵy Elbasynyń «Atameken» tarıhı-mádenı ortalyǵyn, «Batyr babalar» memorıaly men «Anaǵa qurmet» mýzeıin, Kerbulaq aýdanynda Shoqan Ýálıhanovtyń memorıaldyq mýzeıin aralady. Munan keıin qonaqtar Taldyqorǵan qalasyndaǵy Qaratal ózeniniń jaǵalaýynda poezııa keshin ótkizip, Súıinbaı Aronuly men Muqaǵalı Maqataevtyń eskertkishterine gúl shoqtaryn qoıdy. Sondaı-aq oblys ortalyǵyndaǵy Til saraıynda ádebıettiń san salaly taqyryptaryn talqylaǵan seksııalyq jumystar uıymdastyryldy.
Elimizdiń ár óńirinen kelgen otyzǵa jýyq jas qalamgerlermen kezdesýde aımaq basshysy Amandyq batolvtyń quttyqtaý tilegin oblys ákiminiń orynbasary Jaqsylyq Omar jetkizdi.
- Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynda aıtylǵan ulttyq sanany jańǵyrtý ıdeıasynyń túp tamyry – tilde, ádebıette, mádenıette jatyr. Sondyqtan baǵdarlama aıasynda Almaty oblysynda bir jyldan beri 8 myńnan astam shara ótkizilip, 200 joba júzege asyrylýda. Oblys ákimi Amandyq Batalovtyń qoldaýymen byltyr bir mezette 39 kitap jaryqqa shyǵyp, oqyrmanǵa jol tartty. Aldaǵy ýaqytta oblystaǵy barlyq aýyldyq mádenıet úılerin jańǵyrtyp, jańartatyn bolamyz. Sonymen qatar ádebı baıqaýlardyń, shyǵarmashylyq sharalardyń da mańyzy zor. Búgingi forýmǵa oblystyń, respýblıkanyń ár óńirinen talantty jastar jınalyp otyr. Forýmǵa qatysýshylardy osynaý aıtýly sharamen shyn júrekten quttyqtap, barshańyzǵa shyǵarmashylyq shabyt tileımin! – dedi Jaqsylyq Omar.
О́z kezeginde sóz alǵan Qazaqstan Jazýshylar odaǵy basqarmasynyń tóraǵasy Ulyqbek Esdáýlet Jetisý óńirindegi rýhanı jańǵyrý men ádebı úrdisti qoldaýdaǵy ákimdiktiń ıgi bastamasyna rızashylyǵyn bildirdi. Kezdesý barysynda Jazýshylar odaǵynyń oblystyq fılıalynyń dırektory, aqyn Erlan Júnis, oblystyq «Jetisý» gazetiniń bas redaktory, qany Ámire Árin, belgili aqyndar Qalqaman Sarın men Baqytgúl Babash jáne jetisýlyq jas daryn Muhtar Kúmisbek izgi tilekterin jetkizdi.
Osy jıyn barysynda Qazaqstan Jazýshylar odaǵy basqarma tóraǵasy Ulyqbek Esdáýlet odaq músheliginiń qataryna qabyldanǵan jastarǵa saltanatty jaǵdaıda kýálik tapsyrdy. Múshelikke qabyldanǵan arasynda Almaty, Atyraý oblystarynyń, Astana jáne Almaty qalalarynyń jastary bar.
Forým barysynda «Rýhanı jańǵyrý» baǵdarlamasy aıasynda ótken «Máńgilik eldiń muraty» atty oblystyq baıqaýdyń qorytyndysy jarııa etildi. «Máńgilik eldiń muraty» oblystyq baıqaýy bıyl alǵash ret tusaýyn kesip, dástúrli túrde jalǵasatyn ádebı jarysqa aınalmaqshy. Úzdik shyǵarmalarǵa oblys ákiminiń «Aq qaýyrsyn» ádebı júldesi beriledi. Al alǵashqy jarııalanǵan ádebı synǵa 45 jasqa deıingi qalamgerler búrkenshik atpen qatysty. Baıqaýǵa «Rýhanı jańǵyrý» taqyryby, Jetisý ólkesiniń tamasha tabıǵaty jáne erkin taqyryp aıasynda jazylǵan týyndylar qabyldanǵan bolatyn. Qazylar alqasynyń tańdaýyna ilikken jeńimpazdardy oblys ákiminiń orynbasary Jaqsylyq Omar marapattady.
Nátıjesinde, poezııa janry boıynsha I oryndy «Shabyt» halyqaralyq shyǵarmashyl jastar festıvaliniń júldegeri, memlekettik grant ıegeri Saǵynysh Namazshamova ıelense, prozada I oryn jas jazýshy, «Daraboz» báıgesiniń júldegeri Qanat Ábilqaıyrǵa berildi. Qos jeńimpazǵa oblys ákiminiń «Aq qaýyrsyn» ádebı júldesi, aqshalaı syılyqtar men dıplomdar tabystaldy. Poezııa boıynsha II oryndy Erlan Júnis pen Arshyn Nurbaqyt, III oryndy Qozybaı Qurman men Muhtar Kúmisbek ıelendi. Proza janrynda II oryndy Esbolat Aıdabosyn jáne Gúljan Amangeldiqyzy, III oryn Ashat О́mirbaı men Danagúl Bereketke buıyrdy. Júldegerlerdiń barlyǵyna aqshalaı syılyqtar men dıplomdar berildi.
Qalmahanbet MUQAMETQALI,
«Egemen Qazaqstan»
Almaty oblysy
Sýretterdi túsirgen Jumabaı Musabek
