Mundaı sertıfıkattarǵa ıe bolý – SANTO kompanııasyndaǵy sapany qamtamasyz etý júıesiniń jáne óndiris jaǵdaılarynyń joǵary standarttarǵa jaýap beretindiginiń aıǵaǵy. Al bul óndirilip jatqan preparattardyń sapasyna kepildik beredi.
Esterińizge salsaq, GMP standarty (Good Manufacturing Practice) dári-dármek óndirisine, sapany baqylaýǵa, qujatnamany júrgizýge, sondaı-aq, qyzmetkerler quramyna, bólme-jaılar men jabdyqqa arnap jalpy talaptardy belgileıdi. GDP (Good Distribution Practice) – shıkizatty óndiristik kásiporyndarǵa jetkizýden bastap, daıyn ónimdi aqyrǵy qoldanýshylarǵa jóneltýge deıingi jetkizilimniń búkil tizbeginde dárilik zattar aınalymymen aınalysatyn qoımajaılardyń jáne kóterme saýda bazalarynyń sapasyn qamtamasyz etýge arnalǵan júıe.
– Kompanııamyzdyń kezekti bir jetistigin, atap aıtqanda, óndiristik alańdarymyzǵa, sonyń ishinde qatty peroraldy dárilik zattardy óndiretin jańa seh pen dárihana qoımamyzǵa arnap sertıfıkat alǵanymyzdy maqtan tutamyn, – dedi SANTO kompanııasynyń bas dırektory Ijı Ýrbanes. – Bul – álbette, judyryqtaı jumylǵan ujym jumysynyń jemisi. Sondaı-aq, bul – naýqastar sapaly ári tıimdi emge qol jetkize alýy úshin biz qoldan kelgenniń bárin jasap jatqandyǵymyzdyń aıqyn dáleli. Kompanııa usynyp otyrǵan preparattar búgingi kúni kardıologııa, gastroenterologııa, allergologııa, dermatologııa, nevrologııa, gınekologııa, ýrologııa, pedıatrııa, oftalmologııa, pýlmonologııa, otorınolarıngologııa syndy san alýan salalarda keńinen qoldanylyp otyr. Sondaı-aq, biz antıbıotıkterdi de óndiremiz. Biz óz elimizdi súıemiz, árbir qazaqstandyqtyń saýlyǵy – bizdiń basty qamymyz!
«Bizdiń kompanııanyń jańa sertıfıkattarǵa ıe bolǵandyǵy týraly habardy zor qýanyshpen oqydym. Biz 6 jyldan asa ýaqyttan beri Shymkenttegi zaýytty jańǵyrtýǵa zor mán berip kelemiz. Biz óndiris ınfraqurylymy men jabdyǵyna, bárinen buryn, qyzmetkerlerdi álemdik dárejedegi standarttarǵa sáıkes oqytýǵa úlken ınvestısııa quıdyq. SANTO zaýyty Ortalyq Azııadaǵy eń zamanaýı zaýytqa aınalýy úshin kezekti bir nyq qadamyn basyp otyr. Bul sertıfıkattar – SANTO ujymynyń óz isine shyn berilip, eń joǵary standarttarǵa sáıkes jumys jasaı biletindiginiń, tereń kásipqoılyǵynyń aıǵaǵy. SANTO kompanııasynyń Qazaqstandaǵy naýqastarǵa tıgizip otyrǵan zor paıdasyn jáne de jalpy Polpharma kompanııasynyń damýyna qosyp otyrǵan eren úlesin biz erekshe maqtan tutamyz», – dep atap ótti Polpharma toby baqylaý keńesiniń tóraǵasy Ejı Starak myrza.
Aınash ESALI,
«Egemen Qazaqstan».
ALMATY
