«Oqýlyq» respýblıkalyq ǵylymı-praktıkalyq ortalyǵy men Qyzdar Ýnıversıtetiniń uıytqy bolýymen uıymdastyrylǵan basqosýǵa qazaqstandyq jáne sheteldik ǵalymdar men kitap baspalarynyń basshylary qatysty.
Konferensııany «Oqýlyq» respýblıkalyq ǵylymı-praktıkalyq ortalyǵynyń dırektory Beıbitkúl Kárimova ashyp, júrgizip otyrdy.
Qazaq memlekettik qyzdar pedagogıkalyq ýnıversıtetiniń rektory Gaýhar Aldambergenova basqosýdyń máni men mańyzy týrasynda baıandap, onyń bilim berý resýrstaryn jańǵyrtýdaǵy rólin keńinen atap ótti.
– Álemdik órkenıettiń negizgi qozǵaýshy kúshi bilim ekeni barshaǵa belgili aqıqat. Ǵylymǵa qol jetkizý, onyń jetistikterin qoǵamdyq ómirge, eldiń ıgiligine paıdalaný, bilimdi de parasatty urpaq tárbıeleý halqymyzdyń qashannan bergi basty maqsaty boldy. Búgingi báseke zamanynda ǵylym men tehnologııany jetildirmeı, shyn mánisinde táýelsiz el bolý múmkin emes. О́ıtkeni, ǵylym – adamzat ómiriniń eń sheshýshi faktoryna aınalyp otyr. Eldiń sharýashylyǵyn, mádenıetin, onyń qorǵanys qabiletin jan-jaqty damyǵan ǵylym ǵana qamtamasyz ete alady. «Jaqsy oqýlyq – ulttyń ıgiligi, rýhanı qundylyǵy». Oqýlyq daıarlaý isine qazir ulttyq sıpat, memlekettik mańyz berilip otyr. Oqýlyq qurastyrýda jańa tehnologııany oryndy paıdalaný – stýdenttiń jan-jaqty quzyrettiligin damytýǵa, shyǵarmashylyq, synı oılaý qabiletterin qalyptastyrýǵa baǵyt beredi. Bilim berýdiń ulttyq modeline ótý ınnovasııalyq pedagogıkalyq tehnologııalardy ıgerýdi qajet etedi, al ınnovasııalyq tehnologııa degenimiz – pedagogtyń bilimi men biligi, zııatkerlik qabileti. Qazirgi jas urpaqtyń sanaly da sapaly bilim alýynyń sharty – oqý prosesi men oǵan qajetti materıaldardy únemi jańalaý, jańǵyrtý, – dedi G. Aldambergenova.
Sonymen qatar, konferensııanyń plenarlyq májilisinde Anglııanyń «Foxton books» baspasynyń basshysy Iýsýf Výz «Kóptildi bilim berý jáne aǵylshyn tildi oqýlyqtarda mátindi deńgeılep berý mańyzdylyǵy», Y. Altynsarın atyndaǵy Ulttyq bilim akademııasynyń prezıdenti Janbol Jylbaev «Bilim berý mazmunyn jańǵyrtý – qazirgi zamannyń syn-tegeýrinderine jaýap retinde», О́zbek memlekettik álem tilderi ýnıversıtetiniń professory Mahanbet Djýsýpov «Kırıll álipbıiniń qyzmet etý jaǵdaıynda latyn álipbıine kóshý», Vengrııanyń «Mozaik Education» baspasynyń bas dırektorynyń orynbasary Peter Torok «Mozabook» sıfrlyq bilim berý platformasy» taqyryptarynda baıandama jasady.
Konferensııa jumysy «Zamanaýı bilim berý ortasy jáne pedagog kadrlardy daıarlaý», «Bilim mazmunyn jańartý jaǵdaıynda bilim berý resýrstaryn ártaraptandyrý jáne oqý ádebıetterin ázirleý men sapasyn baǵalaýdyń jańa tásildemeleri», «Bilim berý resýrstaryn sıfrlandyrý – jańa bilim men úzdik bilim berý tájirıbelerin meńgerýdiń dańǵyl joly», «Oqý ádebıetterin latyn álipbıine kóshirýdiń ádistemelik máseleleri» jáne «Úsh tildi oqytý júıesine kóshý jaǵdaıynda oqý basylymdaryn ázirleý: tájirıbe jáne bolashaǵy» atty seksııa jumystarynda jalǵasty. Onda oqýlyq avtorlary taqyryp tóńireginde ózindik oılaryn aıtyp, paıymdy pikirlerimen bólisti.
Sonymen qatar jıyn sheńberinde mektepke deıingi tárbıe men oqytýǵa arnalǵan oqýlyqtar men oqý-ádistemelik quraldary avtorlarymen qatysýymen dóńgelek ústel, sheberlik synyptary ótti.
