Kún shaıdaı ashyq, oıynda eshteńe joq. Bir ýaqytta Arlan ózenniń jaǵasyndaǵy parapettiń ar jaǵyndaǵy alańqaıda júrgen balalardy baıqap qalady da, anasynan sol jerge barýdy ótinedi. «Bir qarasam, Arlan «men spaıdermen, men spaıdermen» (órmekshi adam) dep qorshaýǵa órmelep barady. Qolymdaǵy Jáńgirdi jerge qoıa saldym da, úlken ulymdy túsirip alaıyn dep bir sátke ǵana teris aınaldym. Qyrsyq shalǵanda, onyń aıaǵy bir jerge tirelip, bosatqansha bir-eki sekýndtaı aınaldym. Endi Jáńgir jaqqa qarasam, balam joq. Dál sol mezette sýǵa «kúmp» etken dybysty estidim», - dep daýysy dirildeı eske alady sol oqıǵany Jáńgirdiń anasy Perızat.
Balasy sýǵa ketip bara jatsa, qaı ana qarap tursyn?! Jalma-jan ulynyń artynan sýǵa sekiredi. Sekirýin sekirgenimen muzdaı sýyq sý denesin qaryp, júrisin óndirmeıdi. Sábıi bolsa, sýǵa bir batyp, bir shyǵyp, kóz aldynda aǵyspen alǵa qaraı uzaı beredi. Dúnıe kóz aldynda shyr aınalǵan bir mezette sýǵa bir adamnyń sekirgenin, balasyn ustap alǵanyn kóredi. Perızattyń ózine de bir adam kómekke kelip, sýdan alyp shyǵady. Qazir Perızat Ertiske qulap aman qalǵan uly Jáńgirmen birge qaladaǵy Ana men bala ortalyǵynda em-dom qabyldap jatyr. Uıaly telefon arqyly sóıleskenimizde ulyn qutqarýǵa shahardaǵy «Saraptama jáne taldaý» JShS-niń elektrmonterleri Ernar Qadylbekov pen Aıdyn Tórtbaı degen jigitterdiń járdemdeskenin aıtty. «Men bizdi qutqarýǵa atsalysqan barlyq adamdarǵa otbasymyzdyń atynan alǵysymdy bildiremin. Jaǵaǵa shyqqanda jedel járdem de, polısııa qyzmeti de, qutqarýshylar da jınalyp qalǵanyn kórdim. Bizge birden kómek kórsete bastady. Qol-aıaǵy tartylmasyn dep birden ýkol saldy ulyma. Jedel járdemniń dárigeriniń esimin bilmeımin, ol kisige de rahmet. Meni barynsha qoldap, qobaljymaýǵa shaqyrdy. Jáńgirdiń jaǵdaıynyń aýyr ekenin birden eskertti. Biraq qazir ońalyp kelemiz. Aýrýhanadan shyqqasyn báriniń basyn qosyp, quran oqytyp, sadaqa bersek degen oıymyz bar, - deıdi Perızat.
Jáńgirdi sýdan alyp shyqqan qaısar jigit Ernar Qadylbekovke de telefon shalyp, oqıǵanyń qalaı bolǵanyn suradyq. «Ertis jaǵalaýyndaǵy shamdardyń jaryǵyn aýystyryp, úıge qaıtýǵa jınalyp jatqan edik. Osy kezde balanyń sýǵa ketkeni týraly aıǵaı-shýdy estidik. Balany ózenniń aǵysy tómen qaraı áketip bara jatqanyn baıqap, áriptesim Aıdyn ekeýmiz sol jaqqa qaraı júgirdik. Oılanatyn ýaqyt joq. Ustap alsam ba dep qolymdy sozyp edim, jetpeıdi. Sýǵa sekirýge týra keldi. Sábıdi ustap alyp, jaǵada turǵan Aıdynǵa berdim. Kózimniń qıyǵymen balanyń anasyn da bireýdiń qutqarǵanyn kórip qaldym. Ol júrgizýshi Vıtalıı Baqtybaev ekenin artynan bildik. Jaǵaǵa shyqqasyn balaǵa júgirip baryp, qarasam, óńi kókpeńbek eken. Sý jutyp qoıǵan balany avtomatty túrde qutqara bastadym. Murnyn bastym da, dem jiberip, keýdesinen birneshe ret bastym. Kınodan jasandy dem jiberýdi kórgem, sol boıynsha shuǵyl qımyldaý kerek boldy», - deıdi ol.
Azamat QASYM,
«Egemen Qazaqstan»
О́SKEMEN
