Quryltaıda tóraǵanyń esep berýinen bastap, sýretshilerdiń kórmesin uıymdastyrý, odaqtyń qarjylyq júıesine esep berý, býhgalterlik aýdıt máselesi, jańa sekretarıat quramyn saılaý, odaqtyń jańa basqarma tóraǵasyn saılaýǵa deıingi segiz másele kún tártibine qoıyldy. Sýretshiler odaǵy tóraǵasynyń mindetin atqarýshy О́mirbek Jubanııazovtyń jarty saǵatqa josparlanǵan esepti baıandamasynda búgingi Odaqtyń jaı-kúıi men tynys-tirshiligi egjeı-tegjeıli baıandaldy.
Búginde Sýretshiler odaǵy atynan Mádenıet jáne sport mınıstrligine «О́ner suhbaty – dıalog óneri» atty halyqaralyq beıneleý óneriniń festıvali» jobasy, 85 jyldyq mereıtoıǵa baılanysty is-sharalar jobasy joldanǵan. Almaty qalasynyń ákimdigine alty joba, onyń eń bastysy, shahardyń 15 saıabaǵynda sándik-saıabaqtyq músinderdi ornalastyrýdyń dızaın-jobasy, odaq aýlasynda Kórme zalyn salý, Astana qalasynyń 20 jyldyǵyna oraı keskindeme óneri boıynsha sımpozıým ótkizý jobasy qaraýǵa jiberilgen. Sondaı-aq odaq janynan Jastar birlestigi qurylǵan. Máskeýdiń Halyqaralyq konfederasııa baspasynan «Qazaqstannyń beıneleý óneri», «Erkin Mergenov» jáne «Dýlat Álıev» atty úsh ıllıýstrasııalyq albom basylyp shyqty. Sýretshi úshin mańyzdy sanalatyn mundaı albom men katalogtiń 19-y óz elimizdegi baspalardan da jaryq kórgen. Sýretshiler odaǵy ǵylymı-rýhanı ortalyqqa aınaldyrý maqsatynda uıymdastyrylǵan Astanadaǵy Ulttyq mýzeı qoryn jasaqtaýǵa da kóp járdem berip, qazaq halqynyń tarıhy men tanymyn aıshyqtaıtyn týyndylardy tartý etti. Á.Qasteev atyndaǵy Memlekettik óner murajaıymen, Astanadaǵy Qarýly Kúshter mýzeıimen, Almatydaǵy Qarýly Kúshter mýzeıimen, Oqýshylar saraıymen jáne táýelsiz mártebesi bar barlyq zańdy tulǵalarmen birlesip jumys isteý týraly sharttar jasalǵan. Birqatar sýretshiler tarapynan daý týǵyzǵan Qabanbaı batyr kóshesindegi sheberhanalardyń tehnıkalyq pasporty men paıdalanýǵa engizý aktisi búginde tolyqtaı daıyndalǵan.
Basynan daý-damaı, talas-tartys arylmaıtyn shyrǵalańy mol shyǵarmashylyq odaqtardyń arasynan Sýretshiler odaǵynyń da tóbesiniń «shoqtana» kórinetini bárine belgili shyndyq. Tóraǵany saılaý tóńireginen týyndaıtyn tartys ta kóp jaǵdaıda dál osy odaqqa tán. Sondyqtan altybaqan alaýyzdyqqa emes, birlikke, tatýlyqqa shaqyrǵan sóz bul jıynda da aıtyldy. Quryltaıǵa jıylǵan óner qaıratkerleri, endi qalyptasyp kele jatqan erkin oı ıeleri osy qaǵıdamen keliskeni bolar, usynylǵan úsh úmitkerdiń ishinen bir jyldan asa «odaq tóraǵasynyń mindetin atqarýshy» bolyp kele jatqan Qazaqstannyń eńbek sińirgen qaıratkeri О́mirbek Jubanııazovti Qazaqstan Sýretshiler odaǵynyń basqarma tóraǵasy etip saılaýǵa bir aýyzdan pátýalasty.
Aıgúl AHANBAIQYZY,
«Egemen Qazaqstan»
ALMATY
