Qurylys jáne turǵyn úı-kommýnaldyq sharýashylyq isteri komıtetiniń sheshimimen nysanda kúsheıtý jumystary bastalyp, 2015 jyly 30 maýsymda aıaqtaldy. Turǵyn úı kesheniniń qurylysyn aıaqtaýǵa úsh merdiger kompanııa: «Ońdasyn stroı», «Evrostroı» jáne «Elın grýp» belgilendi. Qazirgi tańda 297 páter qonystanýǵa berilmek.
-Bul qurylysy uzaqqa sozylǵan «Aqqý» turǵyn-úı keshenin paıdalanýǵa berý – oblys ákimi Eraly Toǵjanovtyń basty tapsyrmalarynyń biri. Úı qurylysy 2008 jyly bastalǵan. Onyń 5 jylynda nysanda eshqandaı qurylys jumystary júrgizilmedi. Munda shamamen 650 páter bar. Osy aıdyń sońynda 300-den astam páter paıdalanýǵa berilmek.
Al qalǵan 300 páterdi osy jyly 1 qyrkúıekke deıin berý josparlanǵan. Osy ýaqytta «Aqqý-1» tolyqqandy keshenge aınalady. Buryn bul úıdiń tóńireginde týyndaǵan máselelerge qatysty kúdikti joıý úshin «Qazaq qurylys jáne sáýlet ǵylymı-zertteý jáne jobalaý ınstıtýtynan» mamandar shaqyrylyp, tekseris júrgizdik. Olar keshenniń paıdalanýǵa jaramdy ekenin rastap, jazbasha anyqtama berdi, deıdi oblys ákiminiń birinshi orynbasary Serik Amanǵalıev.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
