Beıbitshilik pen berekeniń saltanat qurǵan toıyna Memleket basshysy Nursultan Nazarbaev ta qatysyp, Qazaqstan halqynyń birligi kúnine arnalǵan merekelik konsertti tamashalady.
«Qazaq eli» monýmenti aldyndaǵy alańda Nursultan Nazarbaevty Qazaqstan halqy Assambleıasynyń etnomádenı ortalyqtarynyń ókilderi ózderiniń ulttyq dástúrin kórsetip, án aıtyp, bı bılep qarsy aldy.
Elbasy barsha qazaqstandyqtardy jáne sharaǵa qatysýshylardy memlekettik merekemen quttyqtady.
– Barshańyzdy ortaq meıramymyz – Qazaqstan halqynyń birligi kúnimen quttyqtaımyn. Birliktiń arqasynda biz táýelsiz memleket bola bildik. Bizdiń birligimizdi barlyq ulystar dáriptep otyr. Bizge álemniń túkpir-túkpirinen kóp ultty memleketti qalaı qurý kerek ekenin úırený úshin keletinder bar, – dedi Qazaqstan Prezıdenti.
Memleket basshysy elimiz aıtýly jetistikterge kóp ultty Qazaqstan halqynyń birligi men dostyǵynyń arqasynda qol jetkizgenin atap ótti.
– Birligimizdiń arqasynda biz ozyq damyǵan 30 eldiń qataryna qosylý jáne halyqtyń ál-aýqatyn arttyrý úshin ózimizge jaýapkershilik júktedik. Halqymyzdyń bereke-birliginiń arqasynda men árbir qazaqstandyqtyń ómir súrý jaǵdaıyn jaqsartýǵa baǵyttalǵan «Prezıdenttiń bes áleýmettik bastamasyn» jarııa ettim, – dedi Nursultan Nazarbaev.
Elbasy memlekettiń búgingi jetistikterin eldegi birlik pen tatýlyqtyń jemisi dep baǵalaı otyryp, halyqtyń ál-aýqatyn kóterýge baǵyttalǵan bastamalar eldiń damýyna serpin beretindigine senim bildirdi.
Barshamyzǵa ortaq baqytty qorǵaı bilýimiz kerektigin eskertken Prezıdent, totalıtarlyq rejim kezinde qazaq dalasyna birsypyra etnostardyń kúshpen kóshirilgendigin, alaıda jergilikti halyq – qazaqtyń tereń qurmetiniń arqasynda olardyń aman qalǵandyǵyn atap ótti. Búginde sol qýǵyndalǵan býynnyń urpaǵy qazaq halqymen qoltyqtasa eńsesin kóterip, memleket qurýǵa atsalysyp, el damýyna óz úlesterin qosýda.
Sońynda Qazaqstan Prezıdenti barsha jurtty merekemen quttyqtap, óskeleń urpaqtyń bolashaǵynyń jarqyn bolýyna nıettestik bildirip, ár otbasyna baq-bereke men amandyq tiledi.
– Biz elimizdegi alýan túrli mádenıetterdiń, barlyq tilder men dástúrlerdiń bári de órkendep kele jatqanyn kórip otyrmyz. Biz – birtutas halyqpyz, bir-birimizdi qurmetteımiz ári jaqsy kóremiz, ortaq Konstıtýsııa men zańdarǵa baǵynamyz. Bir-birimizdi qurmettep, dostyq qarym-qatynasta bolý – zor baqyt. Osy birligimizdi saqtap, baqytymyzdyń qadirin bileıik! – dedi Nursultan Nazarbaev.
Elbasynyń salıqaly saıasatynyń arqasynda Qazaqstan halqynyń tilegi de, júregi de – bir, muraty aıqyn, ortaq maqsatqa umtylǵan jasampaz elge aınaldy.
Bul sózderdi Májiliske Qazaqstan halqy Assambleıasynan saılanǵan toǵyz depýtattyń biri – Narıne Mıkaelıan rastaı tústi. Ol Qazaqstan halqy Assambleıasy HHVI sessııasynan alǵan áserimen de bólisip, barsha qazaqstandyqtardy aıtýly merekemen quttyqtady.
– Qazaqstan halqy birligi kúnimen shyn júrekten quttyqtaımyn. Eń izgi, eń jarqyn, barsha halyqty uıystyratyn ulyq mereke yntymaqtyń kıeli besigi – Astana qalasynda erekshe toılanyp jatyr. Uly Dala eli búgin erekshe kúıge bólendi. Keshegi ótken Assambleıa sessııasy mazmundy, maǵynaly bolyp, Memleket basshysy bizderge tapsyrma júktedi. Endi «Prezıdenttiń bes áleýmettik bastamasyn» júzege asyrýǵa kúsh qosyp, ony halyq arasynda nasıhattap, zańdyq negizin qalyptastyrýǵa úlesimizdi aıanbaımyz. Halyqtyń ál-aýqatyn kóterýge baǵyttalǵan aýqymdy bastamalardyń qysqa merzimde ári sapaly oryndalýyna múddelimiz. Osy maqsat búgingi merekeniń de shyraıyn keltirip tur. Aspanymyz árdaıym ashyq bolsyn, halyqtyń ál-aýqaty arta bersin! – dedi N. Mıkaelıan.
Aıtýly sharanyń konserttik baǵdarlamasy da aıryqsha boldy. Ásem bezendirilgen sahnaǵa ár etnos ókilderi ózderiniń ulttyq kıimderimen jarqyrap shyqty.
Qonaqtar eń aldymen elordalyq ulttyq mádenı birlestikterdiń shyǵarmashylyq ujymdarynyń, Astana qalasy Memlekettik akademııalyq fılarmonııasy ártisteriniń jáne estrada juldyzdarynyń qatysýymen «Rýhanı jańǵyrý – birlik pen tutastyq negizi» atty teatrlandyrylǵan qoıylymdy tamashalady.
Konserttik baǵdarlamany «Týreskıı horynyń» «Prazdnık pesnı» án keshi jalǵastyryp, erler ujymymen birge sahna tórinde «Týreskııdiń» SOPRANO áıelder toby óner kórsetti. Odan keıin sahna tórinde Qazaqstan halqy Assambleıasynyń etnomádenı birlestikteri merekege án-shashýlaryn arnady.
Konsertten keıin jınalǵan jurt sporttyq oıyndardy tamashalady. «Qazaq eli» monýmentiniń aldyndaǵy alańda qazaq kúresi, arqan tartys, asyq atý, gir tasyn kóterý jáne qol kúres syndy ulttyq sport túrlerinen jarystar ótkizilip, oǵan qala turǵyndary da qatysyp, mereke mazmunyn onan saıyn baıyta tústi.
Mamyrajaı mamyrdyń alǵashqy kúni Astanada merekelik is-sharalar kóp boldy. Tús áletinde «Báıterek» monýmentiniń aldyndaǵy alańda «Dostyq sherýi» atty velosherý boldy. Sonymen qatar 500 dombyrashydan quralǵan «Uly Dala úni» atty fleshmob uıymdastyrylyp, qala turǵyndaryna erekshe merekelik kóńil-kúı syılady. Bulardan bólek qalanyń kitaphanalarynda, mýzeılerinde, teatrlarynda jáne basqa da mádenıet mekemelerinde birlik pen dostyq merekesine arnalǵan taqyryptyq kórmeler, qoıylymdar men konsertter ótkizildi.
Serik ÁBDIBEK,
«Egemen Qazaqstan»
