Ǵasyrlar boıy qalyptasqan jaýyngerlik rýh, órshil maqsat táýelsizdik bederinde saltanat qurdy. Al táýelsiz el tarıhyndaǵy 7 mamyr – Otan qorǵaýshylar kúni qazaq ulty úshin qashanda erekshe mańyzǵa ıe.
Ásirese jastarǵa patrıottyq rýh berýde bási joǵary. Bul kúni aıryqsha saltanatpen ótetin respýblıkalyq áskerı paradtyń Qazaqstan Respýblıkasynyń Qarýly Kúshteriniń áleýetin kórsetedi.
Bıyl qurylǵanyna 26 jyl tolyp otyrǵan Qarýly Kúshterimizdiń aıbyny asqaqtap, mereıi artýda. Jyl saıyn elimizde ótip kele jatqan áskerı sherý halqymyzdyń jaýyngerligin, batyrlyǵyn aıǵaqtaı túsetin aıryqsha saltanat. Astana qalasynda ótken aıryqsha saltanattyń lebi egemendiktiń rýhyn, táýelsizdiktiń tarıhyn árdaıym tanytyp keledi. Osy oraıda aıtýly sharany bıyl Jambyl jerinde ótkizý josparlanǵan. Búgingi tańda «Mátibulaq» polıgonynda ótetin áskerı paradqa daıyndyq deńgeıi joǵary. Saltanatty sharanyń talapqa saı ótýine elimiz boıynsha barsha áskerı qurylymdar jumylyp, el aıbynyn asyrý maqsatynda birlese jumys atqarýda. Qazaq eliniń birligi men yntymaǵyn tanytatyn, qaısarlyǵy men erligin áıgileıtin sharanyń el tarıhyndaǵy oryny erekshe.
Jalpy, táýelsiz elimizdiń tarıhynda ótip kelgen áskerı sherýlerdiń ózindik erekshelikteri qalyptasqan. Al Jambyl oblysynyń Qordaı aýdanynda ótkeli otyrǵan áskerı sherýge tartylǵan jeke quram men áskerı tehnıkanyń sany jóninen de bıyl ózgeshe sıpat alýda. Máselen, «Mátibulaq» polıgonynda jaıaý ásker men paradtyq eseptop quramynda shamamen 3000-nan asa jaýynger saltanatty marshpen adymdap ótetin bolady.
Budan ózge, sherýge elimizdiń qorǵanys ónerkásibiniń qýatyn dúıim jurtqa áıgileıtin 300 tehnıka men Áýe qorǵanys kúshteriniń 30 birlik avıasııalyq ushaqtary qatysqaly otyr. Jambyl óńirinde ótetin áskerı sherý kezinde qazaqstandyqtar alǵash ret bıylǵy jáne ótken jyldary qorǵanysymyzdyń arsenalyn tolyqtyrǵan jańa áskerı tehnıkalar men zamanaýı qarý-jaraq úlgilerin de tamashalaı alady.
– Bıylǵy jyly Qordaı aýdanynyń Gvardeısk áskerı garnızonynda jaýyngerlik parad ótkizý josparlanyp otyr. Ásirese jastarǵa patrıottyq tárbıe berýde bul saltanatty sharanyń mańyzy erekshe. Ári sherý barysynda elimizdiń qorǵanys salasynyń múmkindiginiń joǵary ekenin de tamashalaýǵa bolady. Máselen «Ońtústik» óńirlik qolbasshylyǵyna qarasty Qordaı aýdanyndaǵy 40 Otar áskerı bazasynda tank, artıllerııa brıgadalary jumys isteıdi. Munda jaýyngerlik daıyndyq ta aıryqsha ádispen joǵary deńgeıde ótedi. Al bıyl Otan qorǵaýshylar kúnine josparlanyp otyrǵan áskerı sherýge qolbasshylyqtan 800-ge jýyq áskerı azamat pen 150-ge tarta tehnıka qatystyrylady dep josparlanýda, – deıdi «Ońtústik» óńirlik qolbasshylyǵy shtab bastyǵynyń orynbasary, podpolkovnık Aman Tájıev.
Búginde «Mátibulaq» polıgonynda Otan qorǵaýshylar kúnine oraı ótetin áskerı sherýge daıyndyq jumystary qyzý júrgizilýde. Elimizdiń qorǵanys salasynyń qaıratyn tanytyp, qýatyn kórsetetin saltanatty sharanyń oblys úshin ǵana emes, elimiz úshin de mańyzy zor.
Hamıt Esaman,
«Egemen Qazaqstan»
Jambyl oblysy
