Osyndaǵy qazaq dıasporasynyń ókilderi ulttyq qundylyqtardy joǵalpaı, jas urpaqtyń halqymyz dástúrleri men tilimizdi umytpaýy úshin jańa serpilispen jumys isteýge talaptanyp otyr. Tusaýkeserde osy jańa qoǵamdyq uıymnyń jetekshisi О́mirǵalı О́tálıev qaı ulttyń da tarıhty bilmeı bolashaǵy bulyńǵyr dep biledi.
«Aıqapty» qurǵandaǵy basty maqsatymyz jas urpaq óz ultynyń, halqynyń tilin, dástúrin umytpasa eken deımiz. Sol úshin jumys isteıtin bolamyz» deıdi О́mirǵalı О́tálıev.
Chelıabi oblysynda 40 myńǵa jýyq qandastarymyz turady. Búginde solardyń arasynda ana tilin biletinderdiń qatary tym seldirep ketken. Biraq sońǵy jyldary jastardyń ulttyq qundylyqtarǵa degen yntasy erekshe. «Aıqap» qazaq ulttyq-mádenı qoǵamdyq birlestigin qurǵan yntaly top onyń jumysyna jastardy tartýdy oılastyryp otyr. Qandasymyz, Troısk qalasyndaǵy №9 orta mekteptiń muǵalimi Ǵalııa Sársenbaeva jeksenbilik mektepte qazaqtarǵa qazaq tilin úıretedi.
«Ana tilin bilmegen ózin qalaı qazaq degen halyqtyń ókilimiz dep aıta alady? Jastardyń týǵan halqyna, elge, týǵan jerine degen patrıottyq sezimi tek ana tili arqyly ǵana qalyptasady. Sondyqtan jańadan qurylyp otyrǵan «Aıqap» qazaq ulttyq-mádenı qoǵamdyq birlestigi eń aldymen dıspora ókilderi arasynda, jastarǵa qazaq tilin úıretýdi berik qolǵa alatyn bolady» deıdi Ǵalııa Sársenbaeva.
Tusaýkeserge Troısk qalasyndaǵy jergilikti atqarýshy bılik jáne Dostyq úıi ókilderi qatysyp, quttyqtady, aldaǵy ýaqytta birlesip jumystar júrgizýge mámilelesti. «Aıqap» qoǵamdyq uıymy Dúnıejúzi qazaqtarynyń qaýymdastyǵy Qostanaı oblystyq fılıalymen jáne Qostanaı oblystyq Tilderdi damytý basqarmasymen tyǵyz baılanysta jumys isteıtin bolady.
Názıra JÁRIMBET,
«Egemen Qazaqstan»
