Birinshi oıynda 2:1 jeńgen «Realǵa» óz alańynda utylmasa da jetetin edi. Kem degende teń nátıje kerek. Zınedın Zıdan qoıǵan maqsatyna jetip, onyń shákirtteri «Bavarııamen» 2:2 teń oınady. Alaıda match barysynda neshe túrli jaǵdaılar oryn aldy. Oıynnyń nebári 5-mınýtynda Iozýa Kımmıh esep ashty. О́tken oıynda da osyndaı oqıǵa oryn alyp edi.
Týra sol ssenarıı bul joly da qaıtalanyp, kóp ýaqyt ótpeı «Real» tarazy basyn teńestirdi. Ishki birinshilikte joly bolmaı júrgen Kárim Benzema syn aıtýshylardyń aýzyna qaqpaq qoıyp ádemi gol soqty. Zıdannyń koroldik klýbtaǵy jaqsy kóretin oıynshysy ári Aljırden shyqqan jerlesi Benzema ekinshi taım bastala bere ekinshi goldy soǵyp, oıynnyń qaharmanyna aınalyp shyǵa keldi. Fransııalyq shabýylshynyń bul Chempıondar lıgasyndaǵy 55-goly bolatyn.
Kezdesýdiń 63-mınýtynda Hames Rodrıges tarazy basyn teńestirip, nemisterge úmit otyn syılady. Resmı túrde «Realdyń» oıynshysy bolyp sanalatyn Hames «Bavarııaǵa» jalǵa berilgen edi. «Realdyń» óz oıynshysy ózine qarsy gol soǵyp, sonyń saldarynan madrıdtik klýb talaı márte jarystan shyǵyp qalǵan-tuǵyn. Fernando Morentes pen Alvaro Moratanyń goldary qalyń jankúıerdiń esinde shyǵar. Al jalpy, kolýmbııalyq jartylaı qorǵaýshy «Real» úshin de jáne «Realdyń» óz qaqpasyna da gol soqqan 7-oıynshy.
Zınedın Zıdan «Realǵa» bapker bolyp kelgeli beri Chempıondar lıgasynyń eki oıynnan turatyn teketiresteriniń eshqaısysynda jeńilgen joq. Fransýz bapkeri «Realdy» 11 márte pleı-off synynan alyp shyqty.
Endi Kıevte ótetin fınalda «Real» álemdik fýtbol tarıhyna taǵy da birneshe ózgertý engizýi yqtımal. Sebebi úsh márte qatarynan Chempıondar lıgasyn jeńgen komanda ázirge tarıhta bolmaǵan. Al Kýbok chempıondarynyń jarysy tarıhynan bastap alar bolsaq, onda madrıdtikter 16-márte fınalǵa shyǵyp otyr. Mundaı kórsetkishti de ázirge eshbir klýb tirkeı alǵan joq.
Ermuhamed MÁÝLEN,
«Egemen Qazaqstan»
