О́tken aptada jartylaı fınaldyń alǵashqy matchtarynda tartysty oıyndar ótti. «Arsenal» óz alańynda «Atletıkomen» teń túsip, «Marsel» «Zalsbýrgty» jeńdi. Bul eki oıynnyń alǵashqysy tartymdy ári shym-shytyryq oqıǵaǵa toly boldy. Londonnnyń «Arsenaly» kezdesý favorıti edi. Ispanııalyqtardyń sapynda qorǵaýshy Shımo Vrsalko «qyzyl qaǵaz» alyp, alańnan qýylǵan soń, «Arsenaldyń» shabýyly kúsheıe tústi. Aleksandr Lıakazzet esep ashyp, «zeńbirekshilerdi» alǵa shyǵardy. Alaıda 80-mınýtta Anýan Grızman tarazy basyn teńestirip ketti. Bul oıynda «Atletıkonyń» bas bapkeri Dıego Sımıone de tóreshiden «qyzyl qaǵaz» alyp, shákirtterine jaqyn jerden aqyl aıta almaı qaldy. Endi ol óz alańyndaǵy oıynda da, trıbýna tórinen oryn alady.
Maýsym sońynda bas bapkerlik qyzmetinen ketetin Arsen Venger 24 jyl basqarǵan komandasymen keteraıaq jasap, bir trofeı jeńip ketkisi keledi. Bul oıyn Venger úshin eýrokýboktegi 250-shi oıyn bolypty. Sonymen birge londondyqtarǵa qazir Eýropa lıgasynyń kýbogy aýadaı qajet. Sebebi olar ishki birinshilikte úzdik tórttikten shyǵyp qalyp, Chempıondar lıgasyna qatysý mártebesinen aıyryldy. Demek, «Vando Metropalıtano» stadıonynda ótetin oıynda Arsen Venger komandasy eshteńeden taıynbaıdy.
Biraq «Atletıko» Eýropa lıgasynyń sońǵy 3 oıynynda, óz stadıonynda múlde gol jibermeı, jeńiske jetip otyrdy. Al «Arsenal» ıspan klýbtaryna qarsy ótken syrttaǵy oıyndardyń basym bóliginde jeńilis tapqan. Onyń ústine «Arsenal» Eýropa lıgasynyń debıýtanty bolyp sanalady. Jaýapty oıynda basymdyq alań ıelerinde bolǵanymen, «Atletıkoǵa» qarsy 7 ret oınap, 4 gol soqqan Mesút О́zil sekildi fýtbolshylar teketires taǵdyryn ózgertip jiberýi múmkin.
Al ekinshi jaýapty oıyn Aýstrııada ótedi. «Zalsbýrg» Fransııanyń ortańqol ujymy «Marseldi» qabyldaıdy. Alǵashqy oıynda Dımıtrı Paıe bastaǵan saıypqyrandar qarsylastyń adymyn ashtyrmaı, 2:0 esebimen basym tústi. Endi óz alańynda 10 oıyn boıy jeńilip kórmegen «Zalsbýrg» fransýzdarǵa ne kúsh kórseter eken?! Jaı jeńip qana qoımaı, aýstrııalyqtarǵa 3 dop aıyrmasy kerek. Osy jylǵy Eýropa lıgasynda olar 3 oıynda 3 dop aıyrmasymen jeńiske jetken. Sonymen qatar qos komanda toptyq deńgeıde bir-birine qarsylas atanǵan. «Zalsbýrg» óz alańynda 1:0 jeńip, syrttaǵy oıyndy teń aıaqtaǵan.
Bul kezdesýdiń jeńimpazy 16 mamyr kúni Lıon qalasynda ótetin fınalda shartty túrde alań ıesi bolyp sanalady.
Ermuhamed MÁÝLEN,
«Egemen Qazaqstan»
