Qys merziminde jabdyqtardyń jumysynda aqaý bolmady, temperatýralyq keste saqtaldy, jospardan tys toqtap qalýlar oryn alǵan joq. Jylý berý aıaqtalmaı jatyp-aq, SSKО́B jylý elektr ortalyǵynyń qyzmetkerleri jabdyqtardy jóndeýge kirisip ketken. Bıyl JEO-ny aýqymdy jóndeý jumystary kútip tur. Bul maqsatqa tórt mıllıard teńgeden astam qarjy baǵyttalmaq.
«Alǵashqy jóndeý jumystaryn biz 20-naýryzda bastadyq . Jóndeýler №4 bý qazandyǵynda, №5 sý jylytqysh qazandyqta, №1 bý týrbınasynda júrip jatyr. Bul jabdyqtardyń barlyǵy qalany jylýmen qamtamasyz etýge qatysady» deıdi «SSKО́B» AQ JEO dırektory Oleg Ábilqaıyrov.
Jaz aılarynda jylý berýshilerdi sý jylytqysh qazandyǵy boıynsha aýqymdy jumystar kútýde. №1 jáne №2 qazandyqtardy konservasııadan shyǵarý, № 5 qazandyqty aǵymdaǵy jóndeýden ótkizý josparlanǵan. Osylaısha, jańa jylý berý maýsymy bastalǵansha barlyq bes sý jylytqysh qazandyq qaıta qalpyna keltiriledi. Munyń barlyǵy jabdyq jumysynyń tıimdiligin, qala men Gornıask kentine jylý men ystyq sý berýdiń sapasy men senimdiligin arttyrý úshin jasalynyp otyr. Negizgi jabdyqtardan bólek JEO ujymy qubyrlardy da nazardan tys qaldyrmaıdy.Jańa jylý berý maýsymyna daıyndyqqa Almaty men Qostanaıdyń merdiger kompanııalarynyń mamandary da kómek berýde.Atalǵan jumystardyń barlyǵy qala turǵyndaryna esh jaısyzdyq týdyrmaıdy.
Kelesi jylý berý maýsymyna daıyndyqpen bir mezgilde JEO-da uzaq merzimdi is-sharalar da jalǵasa beredi. Pavlodar mashına jasaý zaýytymen kómirdi jınaý úshin paıdalanylatyn artý kranyn jasaý jóninde kelisim shart jasalǵan. Qysqy kezeńde stansııanyń úzdiksiz qyzmetin qamtamasyz etetin osy kran arqyly orta eseppen 2,5 myń tonna kómir ótedi. №3 týrbına sılındrin ázirleý boıynsha da jumystar atqarylyp jatyr. Ol Rýdnyı men ónerkásiptik aýmaqty jylytýǵa arnalǵan. Jańa buıymdy Qaraǵandy týrbomehanıkalyq zaýyty daıyndap jatyr.
«JEO-ny jylý berý maýsymyna daıyndaý máselesine jyl saıyn erekshe kóńil bólemiz. Sońǵy jyldary ortalyqta kóp jańarýlar oryn aldy jáne munyń barlyǵy qalany jylýmen jáne ystyq sýmen qamtamasyz etýdi jaqsarta tústi. Biz óz tutynýshylarymyzǵa tek sapaly qyzmet kórsetýge tyrysamyz. Sondyqtan Rýdnyı úshin áleýmettik mańyzy zor nysandy jańǵyrtýǵa qomaqty qarajat bólýdemiz» dedi «SSKО́B» AQ prezıdenti Bereke Muhametqalıev.
Názıra Járimbet,
«Egemen Qazaqstan»
Rýdnyı
