Osy maqsatta Qazaqstan Respýblıkasy Qarýly Kúshteriniń Bas shtaby basshysynyń orynbasary Adylbek Aldabergenov, Áskerı áýe kúshteriniń bas qolbasshysy Dáýren Qosanov, Qurlyq áskerleriniń bas qolbasshysy Murat Bektanov jáne «Astana» óńirlik qolbasshylyǵy áskerleriniń qolbasshysy Dýlat Adyrbekovtiń qatysýymen jaýyngerlik sherýge daıyndyq barysy týraly baspasóz máslıhaty ótti.
Otan qorǵaýshylar kúnine oraı ótkeli otyrǵan áskerı sherýde Qarýly Kúshterdiń zamanaýı tehnıkalyq jabdyqtalýy kórsetiletin bolady. Sonymen qatar, sherýge 3 myńǵa jýyq áskerı qyzmetshi, 300 birlikten asa qarý-jaraq pen áskerı tehnıka jáne shamamen 30 birlik ushý apparaty tartylǵan. Al aýqymdy sharaǵa qatysatyn ofıserler men jaýyngerler sáýir aıynyń basynan bastap Otar áskerı bazasynda daıyndyq jumystaryn júrgizip keledi.
Atalǵan jaýyngerlik sherýde elimizdiń Qorǵanys salasynyń búgingi tańdaǵy áleýeti men kúshi jan-jaqty kórsetiletin bolady. Munda maıdandyq, armııalyq jáne áskerı-kólik avıasııasy, S-295 sý jańa áskerı-kólik ushaqtary men Sý-30 kóp nysanaly joıǵyshtar óziniń joǵary múmkindigin kórsetedi. Sondaı-aq, aýmaqtyq qorǵanys áskerlerine tuńǵysh ret jaýyngerlik týlar tabys etiledi.
Sonymen qatar, baspasóz máslıhatynda jaýyngerlerdiń qatań súzgiden ótkeni de aıtyldy. Nátıjesinde áskerı daıyndyǵy joǵary sarbazdar ǵana sherýge qatysý múmkindigine ıe bolǵan. Olardy irikteý psıhologııalyq jáne saptyq daıyndyq negizinde júrgizilgen.
Búgingi tańda elimizdiń ár óńirinen kelgen áskerı qyzmetshiler baza aýmaǵyndaǵy shatyrlarda turyp jatyr. Áskerı sarbazdar úshin palatkalar, medısınalyq, tamaqtaný pýnktteri jáne jýyný oryndary qarastyrylǵan. Qalashyqtyń aýmaǵynda bos ýaqytty uıymdastyrý úshin jyljymaly aqparattyq keshen de ornalastyrylypty.
Otan qorǵaýshylar kúnine oraı Jambyl óńirinde ótkeli otyrǵan sherýdiń bıylǵy ereksheligi zamanaýı qarý-jaraq pen áskerı tehnıkany, avıasııany jaýyngerlik turǵyda qoldana otyryp, barlaý bólimsheleriniń shynaıy taktıkalyq is-qımyldaryn kórsetý bolyp otyr. Egemen elimizdiń abyroıyn arttyryp, mártebesin bıiktetetin sharanyń bıik deńgeıde ótýi úshin búginde jan-jaqty jumystar júrgizilýde. Sonymen qatar, atalǵan áskerı sharany el turǵyndary respýblıkalyq telearnalardan tikeleı efır arqyly tamashalaı alady. Atalǵan jaýyngerlik sherýdiń Táýelsiz el jastary úshin de mańyzy zor bolmaq.
Hamıt Esaman,
«Egemen Qazaqstan»
Jambyl oblysy
