Q.Ábdirahmanov T.Hrısteanyń Qazaqstan Respýblıkasy men Eýroodaq arasyndaǵy saıası dıalogty tereńdetýge, ekonomıkalyq ózara yqpaldastyqty damytýǵa jáne mádenı-gýmanıtarlyq baılanystardy nyǵaıtýǵa baǵyttalǵan tıimdi qyzmetin erekshe atap ótti.
Kezdesý barysynda 2015 jyly Qazaqstan jáne EO arasyndaǵy Keńeıtilgen áriptestik pen yntymaqtastyq týraly kelisimge qol qoıýlýy ekijaqty qarym-qatynastardy jańa sapaly deńgeıge kótergeni sóz etildi. Kelisim yntymaqtastyqtyń 29 salasyn qamtyp, 2016 jyldyń 1 mamyrynan bastap jartylaı qoldanysqa engen bolatyn. Ol Eýroodaqtyń barlyq 28 múshe elderimen jáne Eýroparlamentpen ratıfıkasııalanýynan keıin tolyq kúshine enetin bolady. Qazirgi tańda Kelisim EO-nyń 23 memleketimen jáne Eýroparlamentpen maquldandy.
Taraptar eki jaqty saýdany odan ári keńeıtý jáne ártaraptandyrý, Qazaqstan azamattaryna vızalyq rejımdi jeńildetý, sondaı-aq EO-Ortalyq Azııa formatyndaǵy yntymaqtastyqty tereńdetý boıynsha josparlardy talqylady. Sonymen qatar, 2018 jylǵy 10-11 mamyrǵa josparlanǵan Qazaqstan Respýblıkasy - Eýropalyq Odaq Parlamenttik Komıtetiniń jyl saıynǵy otyrysyna erekshe nazar aýdaryldy. Bul ınstıtýt 1999 jyldan beri jumys istep, eki jaqty parlamentaralyq dıalogtyń tıimdi alańyna aınaldy.
Q.Ábdirahmanov Eýroodaq Elshisine memlekettik nagrada – Qazaqstan Respýblıkasynyń Qurmet gramotasyn saltanatty túrde tabystady. Qazaqstan Prezıdenti Nursultan Nazarbaevtyń tıisti Jarlyǵynda T.Hrıstea Qazaqstan Respýblıkasy jáne Eýropalyq Odaq arasyndaǵy tabysty yntymaqtastyqty damytýǵa sińirgen eńbegi úshin joǵary nagrada berilip otyrǵany atap ótilgen.
T.Hrıstea ekijaqty yntymaqtastyqty nyǵaıtýǵa qosqan úlesin joǵary baǵalaǵany úshin Qazaqstan Respýblıkasynyń basshylyǵyna jáne EO О́kildigimen nátıjeli ózara is-qımyly úshin syrtqy saıası vedomstvoǵa alǵysyn bildirdi.
Kezdesýdiń sońynda Eýroodaq elshisi Q.Ábdirahmanovqa Eýroodaqtyń Argentına, Úndistan, OAR tárizdi strategııalyq seriktes elderimen qatar Qazaqstanǵa tehnıkalyq jáne qarjylyq kómek kórsetý, ozyq tájirıbe men bilim tabystaý, úshjaqty jobalardy iske asyrý boıynsha pılottyq rejımde arnaıy sharttar beriletini týraly Eýropalyq Komıssııanyń sheshimi týraly habarlady.
