Kezdesýge Qazaqstan halqy Assambleıasy Tóraǵasynyń orynbasary, hatshylyq meńgerýshisi Leonıd Prokopenko, «Nur Otan» partııasynyń hatshysy Farhad Qýanǵanov, Din isteri jáne azamattyq qoǵam mınıstrliginiń ókilderi qatysty.
Aǵymdaǵy jyldyń 28-shi sáýirinde Qazaqstan halqy Assambleıasynyń sessııasynda Qazaqstan Prezıdenti N.Á.Nazarbaev Din isteri jáne azamattyq qoǵam mınıstrligine «Nur Otan» partııasy jáne Qazaqstan halqy Assambleıasymen birge «Rýhanı jańǵyrý» baǵdarlamasyn jáne jańa áleýmettik bastamalardy alǵa jyljytý boıynsha ǵylymı-aǵartýshylyq baǵyttaǵy jańa jobany ázirleýdi tapsyrǵan bolatyn.
Kezdesý basynda Darhan Káletaev Prezıdenttiń tapsyrmalaryn oryndaý úshin barlyq múddeli taraptardyń kúsh-jigerin biriktirý qajettigin atap ótti.
«Memleket basshysynyń tapsyrmalaryn sapaly oryndaý úshin ıntellektýaldy, saraptamalyq jáne uıymdastyrýshylyq resýrstardy biriktirý qajet. О́ńirlermen birlesip, sondaı-aq jobaǵa jastardy jáne «100 jańa esim» jobasynyń qatysýshylaryn qatystyrý mańyzdy», dep atap ótti mınıstr D.Káletaev.
Memleket basshysynyń tapsyrmalaryn oryndaý aıasynda Din isteri jáne azamattyq qoǵam mınıstrligi «Nur Otan» partııasy jáne Qazaqstan halqy Assambleıasymen birlesip biryńǵaı jalpy qundylyqtardy qalyptastyrý negizi retinde qazaq halqynyń tarıhy men mádenıetin tanytýǵa baǵyttalǵan jańa jobany júzege asyratyn bolady.
Kezdesý qorytyndysynda qatysýshylar «Rýhanı jańǵyrý» baǵdarlamasy men jańa áleýmettik bastamalardy ilgeriletý boıynsha ǵylymı-aǵartýshylyq jobany iske asyrý josparyn ázirleýdi usyndy. Bul qujat birqatar is-sharalardy qamtıdy. Atap aıtqanda, jobalyq topty qurý, jobany ǵylymı jáne shyǵarmashylyq ıntellıgensııa ókilderimen talqylaý, sonymen qatar turǵyndar arasynda aqparattyq-túsindirý jumystaryn júrgizý qarastyrylǵan.
