Qos matchtan turatyn teketireste jalpy barlyǵy 13 gol soǵyldy. Bul baıaǵy «Bavarııa» men «Sportıngtiń» rekordymen teń. Bıylǵy Chempıondar lıgasynda birinshi ret jeńilgen «Lıverpýl» «Olımpıko» stadıonynda qatty bir qıyndyq kórdi dep aıta almaımyz. Birinshi taımda 2 gol soǵyp tastap, tóreshiniń aqtyq ysqyryǵyn kútip júrdi. Osylaısha olar 2007 jyldan beri fınalǵa birinshi ret shyǵyp otyr. «Roma» sapyndaǵy fýtbolshylar taǵy bir erlik jasaǵysy kelip edi, ýaqyt shirkin jetpedi. Degenmen sońǵy 5 match qatarynan gol soqqan Edın Djekonyń tegeýrini kúlli jankúıerlerdiń rızashylyǵyn týdyrdy.
Fınalıster anyqtalyp, bolar is bolǵannan soń kim jeńimpaz atanýy yqtımal degen suraqtyń tóńireginde tebirenip kórsek. «Lıverpýl» bıylǵy Chempıondar lıgasynda 46 gol soǵypty. Bul brıtanııalyqtardyń shabýyly shań juqtyrmaıdy degen sóz. Fırmıno men Salah 10 goldan soqsa, sońǵy 8 oıynda Sadıo Mane 9 gol toǵytty.
«Realdyń» da kórsetkishteri jaman emes. О́zderińiz biletindeı, bul klýb bıylǵy básekede birneshe ret rekordtardyń murtyn buzdy. Eń kóp jeńiske jetken, qatarynan fınalǵa shyqqan degen sekildi ataqtary jetip jatyr. Al bir Krıshtıaný Ronaldýdyń ózi jekeleı synda birneshe ret aty ańyzǵa aınalǵan fýtbolshylardyń jetistikterinen asyp tústi. Bıyldyń ózinde portýgal fýtbolshysy jalǵyz júrip 15 gol soqty. Madrıdtik klýb fınalǵa deıin 12 kezdesý ótkizdi. Onyń 8-inde jeńiske jetip, 2 oıyndy teń aıaqtap, tek 2-eýinde ǵana jeńildi. 30 gol soǵyp, qaqpalaryna 15 dop jiberdi.
«Lıverpýl» de fınalǵa deıin 12 kezdesý ótkizdi. 7 oıynda jeńis toılap, 4 matchta teń túsip, 1 kezdesýde jeńilip qaldy. Toptyq kezeńnen bastap sanaǵanda 40 gol soǵyp, qaqpasyna nebári 13 dop qana jibergen. Bul jaǵynan, árıne «Lıverpýldiń» basymdyǵy seziledi.
Odan bólek, qos komandanyń osy týrnırdegi bir-birimen kezdeskendegi jaǵdaılary she? Bul turǵyda da aǵylshyndardyń basymdyǵy bar. Koroldik klýb pen «mersısaıdtyqtar» 5 márte kezdesip, sonyń úsheýinde «Lıverpýl» jeńiske jetken. Qalǵan ekeýin ıspandar utty. Al 2008/2009 jylǵy Chempıondar lıgasynyń 1/8 fınalynda Rafael Benıtes shákirtteri «Realdy» «Bernabeýde» 1:0 (Benaıýn), «Enfıldte» 4:0 (Torres 16, Djerrard 28, 47, Dossena 88) esebimen jeńdi. Alaıda 2014/2015 jylǵy maýsymda «Real» «Lıverpýldi» óz alańynda 1:0 (Benzema), «Enfıldte» 3:0 (Ronaldý 23, Benzema 30, 41) qylyp, esesin qaıtardy.
Qos komandanyń da ózindik erekshelikteri bar. Deı turǵanymen, jalpylama alǵanda «Lıverpýldiń» shabýyly «Realdykinen» sál myqtyraq bolǵanymen, «Realdyń» da qorǵanysy «Lıverpýldikinen» áldeqaıda myqtyraq. Túrli salystyrmaly jaǵdaılardy keltirgenimen, barlyǵyna núkte qoıatyn bir ǵana match. Ol 26 mamyr kúni Kıevte ótetin fınal.
Ermuhamed MÁÝLEN,
«Egemen Qazaqstan»
