Qyzylordada ótetin 73-shi memleketaralyq komıssııa otyrysyna qatysý úshin О́zbekstan Respýblıkasynyń sý sharýashylyǵy mınıstri Shavkat Hamraev, QR aýyl sharýashylyq vıse-mınıstri Erlan Nysanbaev, Tájikstan Respýblıkasynyń energetıka jáne sý resýrstary mınıstriniń birinshi orynbasary Sýlton Rahımzoda jáne Túrikmenstan sý jáne aýyl sharýashylyǵy mınıstriniń orynbasary Magtymgýly Baıramdýrdyev jumys saparmen keldi.
Memleketaralyq úılestirýshi sý sharýashylyǵy komıssııasy 1992 jylda Ortalyq Azııa elderiniń Aral teńizi basseınindegi sý sharýashylyǵy máseleleri boıynsha sheshim qabyldaý alańy retinde quryldy.
Oblys ákiminiń orynbasary Serik Qojanııazov atap ótkendeı, bıyl boljam boıynsha aıaq sý az bolady, sondyqtan sý resýrstaryn memleketter arasynda úlestirý máselesi óte mańyzdy, ásirese Syrdarııa ózeniniń tómengi aǵymynda ornalasqan Qyzylorda oblysy úshin ózekti bolmaq.
Komıssııa otyrysynda qatysýshylar 2017-2018 jj. Syrdarııa men Ámýdarııa basseınderindegi vegetasııaaralyq kezeń qorytyndysyn talqylap, 2018 j. vegetasııalyq kezeńde sý alý lımıtteri men sý qoımalarynyń jumys kestesin bekitti, sondaı-aq, «Aral teńizi basseıniniń sý resýrstaryn keshendi basqarý paıdalaný jáne qorǵaýyna aqparattyq-taldaý qamtamasyz etý jáne Qazaqstan, Qyrǵyzstan, Tájikstan, Túrikmenstan men О́zbekstan arasyndaǵy aqparat almasýdy uıymdastyrý jóninde» Kelisim jobasy bekitildi. Odan bólek, qatysýshylar memleketaralyq komıssııanyń jumysyn odan ári kúsheıtý máselelerin talqylap, komıssııanyń 74-shi otyrysyn ótkizý baǵdarlamasy men ornyn kelisti.
Tústen keıin otyrys qatysýshylary Qyzylorda oblysynyń ákimi Q.Kósherbaevpen kezdesti. Kezdesý barysynda aımaq basshysy komıssııa jumysynyń kórshi memleketter arasynda sý sharýashylyǵy máselelerin retteýdegi mańyzdylyǵyn atap ótti.
Esterińizge sala keteıik, bıyl Halyqaralyq Aral teńizin qutqarý qorynyń qurylǵanyna 25 jyl boldy. 1993 j. 25 naýryz kúni Memleket basshylarynyń Qyzylorda qalasynda ótken sammıtinde qordy qurý jóninde sheshim qabyldandy. Jalpy alǵanda, Ortalyq Azııa elderiniń sý resýrstaryn birlese basqarý jónindegi áriptestigine bıyl týra 100 jyl bolmaq, óıtkeni 17 maýsym kúni «Túrkvodhoz» - buryn quramynda komıssııa músheleri bolǵan Túrkistan respýblıkasynyń sý sharýashylyǵy basqarmasynyń qurylýyna 100 jyl bolady.
«Aral teńizi máselesi baıaǵyda jeke bir aımaq nemese eldiń sheńberinen shyǵyp, búkilálemdik deńgeıdegi másele boldy. Jaǵdaıdy jaqsartý úshin sý resýrstaryn tıimdi paıdalanyp, sý alý lımıtterin saqtaý boıynsha jumysty ári qaraı kúsheıtý kerek. Osy máseleler 15 naýryz kúni Astana qalasynda Memleket basshylardyń kezdesýinde talqylandy. Al tamyz aıynda Ashhabadta Halyqaralyq Aral teńizin qutqarý qoryna qatysýshy elderiniń Memleket basshylary keńesiniń otyrysy josparlanýda», - dep atap ótken oblys ákimi Memleket basshylarynyń otyrysyna oraı komıssııa jumysyn ári qaraı jetildirý boıynsha usynystardy ázirleý jóninde usynys aıtty.
Kezdesýge qatysýshylar komıssııa otyrysynyń joǵary deńgeıde uıymdastyrylǵanyn jáne onyń jumysyna barynsha yqpaldastyq jasalǵanyn atap ótti. Máselen, О́zbekstan Respýblıkasynyń Sý resýrstary mınıstri Shavkat Hamraev sýdy paıdalaný máseleleri Ortalyq Azııa elderi úshin asa mańyzdy ekenin jáne óz tarapynan osy salada áriptestik qarym-qatynas ornatýǵa daıyn ekenin aıtty.
Memleketaralyq komıssııanyń 74 otyrysy Ashhabad qalasynda ú.j. qyrkúıek aıynda ótkiziledi dep josparlanýda.
