Jıyndy ashqan «Nur Otan» partııasy Tóraǵasynyń birinshi orynbasary Máýlen Áshimbaev Elbasynyń partııaǵa Qazaqstan halqy Assambleıasymen jáne azamattyq qoǵam ókilderimen birlesip bes áleýmettik bastamanyń júzege asyrylýyn qoǵamdyq baqylaýǵa alýdy tapsyrǵanyn aıtty. Soǵan baılanysty jańadan qurylǵan Qoǵamdyq keńes Elbasy bastamalarynyń ýaqtyly ári sapaly oryndalýyna jalpyhalyqtyq baqylaýdy qamtamasyz etpek.
– Qoǵamdyq baqylaýdy júzege asyrý úshin «Nur Otan» partııasy Ortalyq apparattan bastap, Májilis pen barlyq deńgeıdegi máslıhattardaǵy depýtattyq fraksııalaryn, partııanyń fılıaldary men bastaýysh partııa uıymdaryn jáne qoǵamdyq qabyldaý bólmelerin jumyldyrady. Sonymen birge biz Prezıdenttiń bes áleýmettik bastamasyn ýaqtyly ári sapaly júzege asyrýdyń qazaqstandyqtar úshin qanshalyqty mańyzdy ekenin eskerip, azamattyq qoǵam ókilderimen kúsh biriktirip jumys isteýimiz kerek, – dedi Máýlen Áshimbaev.
Sonymen qatar partııa Tóraǵasynyń birinshi orynbasary «Nur Otan» partııasy Prezıdenttiń bes áleýmettik bastamasynyń júzege asyrylýyn aıryqsha baqylaýǵa alatynyn aıtyp, tipti osy iste olqylyq jibergen sheneýnikter der kezinde anyqtalatynyn da tilge tıek etti.
– Biz Prezıdenttiń bes áleýmettik bastamasyn júzege asyrýda nemquraıdylyq tanytqan kez kelgen sheneýnikti der kezinde anyqtaımyz. Qajet bolsa «Nur Otan» partııasy ondaı sheneýnikterdi jaýapqa tartý máselesin de kóteretin bolady. Biz eshkimge Elbasy bastamalaryn sózbuıdalyqqa salyp, kesheýildetýge jol bermeımiz. Sondyqtan osyǵan qatysty málimetterdi keńes memlekettik organdar, qoǵamdyq birlestikter, úkimettik emes uıymdar, sarapshylar jáne qarapaıym halyqpen tyǵyz jumys isteý arqyly túrli derekkózderden alyp otyrady. Halyq qajetti aqparattardy qoǵamdyq qabyldaý bólmesi, partııanyń veb-saıtyndaǵy arnaıy «5bastama» aıdary nemese jedel jeli arqyly habarlasyp bere alady. Mundaı qadam bes áleýmettik bastamany júzege asyrý kezindegi olqy tustardy ýaqtyly anyqtap, ony tıimdi sheshý joldaryn qarastyrýǵa múmkindik beredi, – dedi Máýlen Áshimbaev.
Otyrysta bes áleýmettik bastamanyń júzege asyrylýyn baqylaýdyń tıimdi tetikteri men osy baǵyttaǵy ózara is-qımyl barysy talqylandy. Keńes tóraǵasy bolyp Senat depýtaty Baqytjan Jumaǵulov taǵaıyndalsa, onyń jumysyn uıymdastyrýdy «Nur Otan» partııasy qamtamasyz etedi. Iаǵnı, bastamalardyń ár baǵyty boıynsha qurylǵan jumys tobynyń qyzmetin partııa hatshylary úılestiretin bolady.
Keńestiń basty mindeti – áleýmettik bastamalardyń júzege asyrylýyna qoǵamdyq monıtorıng júrgizip, turaqty baqylaýda ustaý, baǵdarlamanyń oryndalý barysy týraly halyqqa aqparat berip, qajetti túsindirý jumystaryn uıymdastyrý, sondaı-aq Elbasy bastamalaryn júzege asyrý kezindegi máselelerdi anyqtap, tıisti memlekettik organdarǵa olardy sheshý joldaryn usyný.
Jıyn barysynda ortalyq jáne jergilikti memlekettik organdardyń jetekshileri sóz alyp, bes áleýmettik bastamany júzege asyrýdaǵy búgingi ahýal jaıynda jáne baǵdarlamanyń oryndalýyn baqylaý jónindegi arnaıy monıtorıngtik top qurý barysyn aıtyp berdi. Atap aıtqanda, osy baǵyttaǵy Úkimet jumysy týraly Ulttyq ekonomıka mınıstri Tımýr Súleımenov baıandama jasady. Al Ulttyq bank tóraǵasynyń orynbasary Oleg Smolıakov «7 – 20 – 25» jańa turǵyn úı baǵdarlamasynyń tetikteri men shaǵyn nesıe berý máselesine toqtalyp ótti. О́z kezeginde Qazaqstan joǵary oqý oryndary qaýymdastyǵynyń prezıdenti, «Turan» ýnıversıtetiniń rektory Rahman Alshanov stýdent jataqhanalarynyń qurylysy men qosymsha bólingen 20 myń bilim granty jaıynda sóz qozǵady. Otyrysta saıası partııa men qoǵamdyq birlestik ókilderi de sóz alyp, óz oılarymen bólisti.
Serik ÁBDIBEK,
«Egemen Qazaqstan»
