9 mamyr – Jeńis merekesi qarsańynda oblys ákimi Danıal Ahmetov О́skemen qalasy, Zyrıan men Glýbokoe aýdandarynda turatyn birneshe soǵys ardageriniń úıine arnaıy baryp, meırammen quttyqtap, jarty mıllıon teńgeniń sertıfıkatyn tabys etti. Ulan aýdanynyń týmasy, búginde oblys ortalyǵynda bala-shaǵasynyń ortasynda baqytty ǵumyr keship jatqan Qabataı Qaldybaev aqsaqal 5 mamyrda 100 jasqa toldy. Qara jáne Azov teńizderi jaǵalaýlaryn jaýdan qorǵap, Soltústik-Kavkaz maıdanynda shaıqasyp, zeınetkerlikke shyqqanǵa deıin Belogor taý-ken baıytý kombınatynda órt sóndirýshi bolyp eńbek etken qarııany aımaq basshysy ǵasyrlyq mereıtoıymen quttyqtap, ıyǵyna shapan japty. «Ár ardager men tyl eńbekkeri – halqymyzdyń qazynasy, ulttyq maqtanyshy. Urpaq bolashaǵy jolynda tanytqan qaısarlyqtaryńyz úshin alǵysymyz sheksiz. Mundaı qurmetke búginde TMD-nyń birde-bir eliniń ardagerleri ıe bolyp otyrǵan joq dep senimmen aıta alamyn. Bul eń aldymen Elbasymyz Nursultan Nazarbaev júrgizip otyrǵan saıasattyń jemisi. Biz sizderdi qashan da maqtan tutamyz», – dedi oblys ákimi.
Oblys ákimdigi tarapynan berilip jatqan 500 myń teńge maıdangerlerdiń esepshotyna aýdarylyp ta qoıypty. Bir qyzyǵy, oblys ákimi Zyrıan aýdanyndaǵy bir ardagerge sertıfıkat tapsyra otyryp: «aqsaqal, aqshańyzdy aýdardyq. Bilesiz be?» dep suraǵanda basyn shaıqapty. Sirá, balalary aqshanyń túskenin aıtpaǵan sekildi. Sodan da bolar D.Ahmetov ózi quttyqtaǵan árbir ardagerge osy suraǵyn qoıyp, kózin jetkizgendeı boldy. Másele – aqshada emes qoı. Búginde 90-nan asyp, 100-ge jýyqtaǵan qarııalar aqshaǵa emes, eń áýeli jyly qabaq pen ashyq peıilge zárý ekeni anyq.
Azamat QASYM,
«Egemen Qazaqstan»
Shyǵys Qazaqstan oblysy
