7 mamyr Otan qorǵaýshylar kúnine oraı búgin «Otar» 40-shy áskerı bazasynda Elbasy – Qazaqstan Respýblıkasy Qarýly Kúshteriniń Joǵarǵy Bas qolbasshysy Nursultan Nazarbaevtyń qatysýymen Jaýyngerlik parad ótti. Jaýyngerlik parad – bul áskerı paradtyń jaýyngerlik oqý-jattyǵýlar jáne jaýyngerlik daıarlyq elementterimen úılesýi. Elimiz úshin aıryqsha mańyzy bar Jaýyngerlik paradqa qatysqan Nursultan Ábishuly barsha qazaqstandyqtardy 7 mamyr Otan qorǵaýshylar kúnimen quttyqtap, bul kúnniń egemen elimiz úshin erekshe mańyzdy ekenin aıtty.
– Qymbatty qazaqstandyqtar, sardarlar men sarbazdar! Qadirli ardagerler! Barshańyzdy Otan qorǵaýshylar kúnimen shyn júrekten quttyqtaımyn. Bahadúr babalar Uly dalamyzdy aq bilektiń kúshimen, aq naızanyń ushymen qorǵap, bizge amanat etip qaldyrdy. «Urandy eldiń urpaǵy aıbarly keledi» degen dana halqymyz. Búgingi aıbyndy armııamyz úshin eldiń tynyshtyǵyn saqtap, Táýelsizdiktiń qorǵany bolý mártebeli zor mindet. Jaýjúrek jaýyngerlerdiń kóteretin júgi aýyr. Biraq ol abyroıly borysh, qasterli paryz. Qarýly Kúshterimiz halqymyzdyń senimdi tiregi, memlekettiń berik qalqany, – dedi Elbasy.
Sonymen qatar, bul Jaýyngerlik parad qazaqstandyq armııanyń kásibı eptiligin, jınaqylyǵy men eseptoptardyń áskerı múmkindikterin tájirıbede kórsetip, elimizdiń áskerı áleýetin jahanǵa áıgiledi. Jaýyngerlik paradqa 3 myńǵa jýyq áskerı qyzmetshi, 300 birlik qarý-jaraq pen áskerı tehnıka jáne 40 birlik ushý apparaty qatysty.
Jaýyngerlik parad eki bólimnen turdy. Birinshi bólimde Elbasy – Qazaqstan Respýblıkasy Qarýly Kúshteriniń Joǵarǵy Bas qolbasshysy Nursultan Nazarbaevtyń atynan aımaqtyq qorǵanys brıgadalary Astana men Almaty qalalarynyń jáne oblystardyń ákimderine jaýyngerlik Týdy tabys etti. Týdy tabys etý rásiminen soń dástúr boıynsha kórermender paradtyń saltanatty sherýin, onyń ishinde Qazaqstan Respýblıkasy Qarýly Kúshteri Arnaıy operasııalar kúshteriniń, Memlekettik kúzet qyzmetiniń, Qazaqstan Respýblıkasy Ishki ister mınıstrligi Ulttyq gvardııasynyń, sondaı-aq aımaqtyq qorǵanys áskerı qyzmetshileriniń jáne paradtyń 19 jaıaý eseptobynyń sherýin tamashalady.
Paradtyń ekinshi bóliminde zamanaýı qarý jaraq pen áskerı tehnıkany urysta qoldana otyryp, barlaý áskerı bólimsheleriniń shynaıy taktıkalyq is qımyly kórsetildi. Jaýyngerlik paradtyń sońynda ushqyshtar toby joǵary deńgeıde «Jetisý barysy» joǵary pılotajdy oryndady.
Qazaqstan Respýblıkasy Qarýly Kúshteriniń Joǵarǵy Bas qolbasshysy Nursultan Nazarbaev paradqa qatysýshylarǵa dalalyq jaǵdaıda kórsetken sheberligi, atys pen áskerı eptiliktegi dáldigi úshin alǵysyn bildirdi.
Sonymen qatar, el azamattary Qazaqstan Respýblıkasy armııasynyń jaýyngerlik qýatyn, áskerı qyzmetshilerdiń kásibı jumysy men bólimshelerdiń túrli is-qımyldaǵy jınaqylyǵyn respýblıkalyq telearnalar men Qazaqstan Respýblıkasy Qorǵanys mınıstrliginiń resmı saıtynyń tikeleı efıri arqyly tamashalady.
Hamıt ESAMAN
«Egemen Qazaqstan»
Jambyl oblysy,
Qordaı aýdany
Sýretter Qorǵanys mınıstrliginiń baspasóz qyzmetinen alyndy
