Jambyl oblysynda da Jeńis kúnin merekeleýge arnalǵan daıyndyq jumystary qyzý júrgizilýde. Bıylǵy jyly Taraz qalasyndaǵy Baýyrjan Momyshuly atyndaǵy «Jeńis» saıabaǵynda jańǵyrtý jumystary qolǵa alynyp, nátıjesinde atalǵan saıabaq el rýhyn kóteretin, jastarǵa patrıottyq tárbıe beretin ortalyqqa aınaldy. Naýryz aıynyń bel ortasynda bastalǵan kúrdeli jóndeý jumystarynyń nátıjesinde saıabaq bir jarym aıdyń ishinde adam tanymastaı ózgerdi. Endigi jerde bul saıabaq jambyldyqtar úshin shejireli, kıeli ortalyqqa aınalyp otyr.
Uly Jeńis kúni merekesine oraı, áýeli saıabaqtyń burynǵy temirden salynǵan arkasy aýystyrylyp, onyń ornyna travertın tasynan órilgen qabyrǵalar boı kóterdi. Sonymen qatar, saıabaqqa kireberistegi sýburqaq buzylyp, tegistelip, onyń oryny da úlken alańǵa aınaldy. Jambyl oblystyq qazaq drama teatrynyń aldynda turǵan Baýyrjan Momyshulynyń eskertkishi osynda ákelinip, tas tuǵyrǵa ornalastyrylǵan. Al buryn Tóle bı dańǵylynyń boıynda turǵan «Máńgilik alaý» «Jeńis» saıabaǵyna kóshirildi. Sonymen qatar, batyr eskertkishiniń qos qaptalynda ornalasqan «Batyrlar alleıasy» saıabaqtyń sánin arttyryp, rýhyn bıiktetip tur. Eldiń esinde, urpaqtyń jadynda júrsin degen nıetpen Áýlıeata óńirinen shyqqan 48 Keńes Odaǵy Batyrynyń esimderi jazylǵan arnaıy taqtaıshalar da osy jerden oryn alǵan. Ári olar jeke-jeke tuǵyrǵa ornatylyp, tuǵyrdyń orta tusyna maıdanda kózsiz erlik kórsetken jaýyngerlerdiń keýdesine taǵylǵan «Altyn juldyz» medaldarynyń úlkeıtilgen kóshirmeleri ilingen.
Al kirpishten órilip, granıtpen qaptalyp boı kótergen 6 qabyrǵaly «Dańq alleıasy» monýmentaldy kesheni ór rýhty babalardyń erligin eske salatyn dúnıe. Bul jerde Jambyl óńirinen maıdanǵa attanǵan 105 myń jaýyngerdiń esimderi tasqa qashalyp jazylǵan. Otan qorǵaýǵa attanǵan batyrlardyń esimderi olardyń soǵysqa jiberilgen aýdandary boıynsha rettelgen eken. Budan bylaı, óńirimizden Otan qorǵaýǵa attanǵan batyrlardyń arnaıy taqtaǵa jazylǵan esimderi elge ulaǵat, urpaqqa ónege syılap turady. Sonymen qatar, bolashaqta saıabaq aýmaǵynan soǵys jáne tyl ardagerlerine arnalyp mýzeı boı kóteretin bolady.
Oq pen ottyń ortasynda bolyp, Otan qorǵaǵan erlerdiń erligin qalaı aıtsaq ta jarasady. Ardagerlerdi ardaqtap, olarǵa qurmet kórsetý de urpaqtyń paryzy. Sondyqtan da bıyl jambyldyqtar úshin Uly Jeńis kúnin jańǵyrǵan, jańarǵan saıabaqta atap ótýge múmkindik týdy. Bul Uly Jeńis merekesine kórsetilgen úlken qurmet ekeni anyq.
Hamıt ESAMAN,
«Egemen Qazaqstan»
Jambyl oblysy
