Búgin, 9 mamyrda Jeńis saıabaǵynda máńgilik alaý memorıalyna gúl qoıý saltanatty rásimi bastaldy.Uly Jeńistiń 73 jyldyǵyna arnalǵan sharaǵa 10 soǵys ardageri qatysty.
Qalalyq jumyspen qamtýdy úılestirý jáne áleýmettik baǵdarlamalar basqarmasynyń basshysy Nurly Habıevanyń aıtýynsha, Atyraý oblysynda qazir 30 soǵys ardageri, 1 konslager tutqyny, 1 habarsyz ketken soǵysqa qatysýshynyń jesiri bar. -Jeńis kúnine oraı Atyraý oblysyndaǵy soǵys ardagerleri jergilikti bıýdjetten 300 myń teńge aldy. Jyl saıyn demeýshiler esebinen qarııalar Qazaqstan men TMD elderindegi shıpajaılarǵa jiberiledi. Búgingi sharaǵa densaýlyqtaryna baılanysty kóp ardagerler qatysa almady, kópshiligi tósek tartyp jatqan adamdar, -dedi Nurly Habıeva.
Máńgilik alaýǵa gúl qoıý rásimine jalpy sany 10 myńnan astam adam qatysty. Dástúrli únsiz eske alý mınýtynan keıin Atyraý oblysy turǵyndary men qonaqtary máńgilik alaýǵa gúl qoıdy.
-Atyraý oblysynan 43 myńǵa jýyq jaýynger soǵysqa attandy, 13 myńy qaıta oralmady. Qazir 3 myń tyl ardageri men 30 soǵys ardageri ortamyzda bar. Erlikterińizge qurmetpen bas ıemiz. Memleket basshysy aıtqandaı, ár otbasynda soǵys salǵan iz qaldy. Sondyqtan bul kúndi urpaqtar jadynda atalarymyzdyń, ákelerimizdiń erligi, batyrlyǵy qalýy úshin atap ótemiz, - dedi qatysýshylarǵa Atyraý oblysynyń ákimi Nurlan Noǵaev.
