Almaty qalasy, 28 gvardııashy-panfılovshylar atyndaǵy saıabaq
Elbasy ardagerler men rásimge qatysýshylarǵa arnalǵan quttyqtaý sózinde qazaqstandyqtardyń fashıstik basqynshylardy jeńýge zor úles qosqanyn erekshe atap ótti.
– Qazaqstannan maıdanǵa 1 mıllıon 800 myńnan astam jaýynger attandy. Solardyń jartysy qaıtyp oralmady. Olar soǵysta eren erlik kórsetti. 500 otandasymyz Keńes Odaǵynyń Batyry atandy. Tyl eńbekkerleri maıdanǵa qarý, azyq-túlik jáne kerek-jaraq jóneltý úshin kúndiz-túni tynymsyz jumys istedi, – dedi Nursultan Nazarbaev.
Qazaqstan Prezıdenti surapyl soǵysty kórmegen qazirgi urpaqtyń baqytty ekenin aıtty.
– Bizdiń atalarymyz revolıýsııa men repressııany, ákelerimiz Uly Otan soǵysyn bastan ótkerdi. Al bizdiń urpaq beıbit zamanda ómir súrýde. Buǵan ardagerlerimizdiń qosqan úlesi zor. Sizderge alǵysymyz sheksiz! – dedi Memleket basshysy.
Rásim sońynda Elbasy soǵys jáne eńbek ardagerlerimen erkin áńgimelesti.
– Sizder janymyzda júrgende, bizder – balalaryńyz ben nemerelerińiz, ózimizdi alańsyz sezinemiz. Erlikterińizdi úlgi-ónege tutyp, sizderden qaısarlyqty, Otanymyzdyń patrıoty bolýdy, Atamekendi súıýdi, sondaı-aq Otanymyz úshin qasyq qanymyz qalǵansha kúresip, súıikti Qazaqstanymyz úshin janymyzdy qurban etýge daıyn bolýdy úırenemiz. Qymbatty dostar, barshańyzdy merekelerińizben quttyqtaımyn! Sizderge zor densaýlyq, tabys jáne jaqsylyq tileımin! – dedi Qazaqstan Prezıdenti.
Maıdangerler Nursultan Nazarbaevqa erekshe iltıpaty men qamqorlyǵy úshin shynaıy rızashylyǵyn bildirdi.
