Jıynǵa Eńbek jáne halyqty áleýmettik qorǵaý vıse-mınıstri Svetlana Jaqypova, Qarýly Kúshterdiń Bas shtaby tárbıe jáne ıdeologııa departamenti basshysynyń orynbasary Qanatbek Belgibekov jáne ardager Ahat Bekmadı qatysty.
S.Jaqypovanyń derekterine súıensek, bıyl Ekinshi dúnıejúzilik soǵystyń ardagerlerine bir rettik kómek retinde 2,7 mıllıard teńge kólemindegi bir jolǵy aqshalaı tólem qarastyrylǵan. Sondaı-aq 2,6 mıllıard teńge somasyndaǵy áleýmettik qoldaýdyń qosymsha sharalary bar.
«Búgingi kúni respýblıkada 2067 Uly Otan soǵysynyń qatysýshylary men múgedekteri, 39 723 olarǵa teńestirilgen adamdar, 166 700 Uly Otan soǵysy qatysýshylaryna teńestirilgen basqa sanattaǵy tulǵalar turyp jatyr», dedi S.Jaqypova.
Elimizde ardagerleri eń kóp qala – Almaty, munda 268 soǵys ardageri turady. Shyǵys Qazaqstan oblysynda – 176, Ońtústik Qazaqstan oblysynda 124 ardager bar. Mańǵystaý oblysynda 24 ardager bar eken.
Ardagerlerge kórsetiletin bir rettik tólem mólsheri aımaqtardyń ekonomıkalyq jaǵdaıyna baılanysty ártúrli. Máselen, Astana qalasy men Shyǵys Qazaqstan oblysynda soǵysqa qatysýshylar 500 myń teńge somasyndaǵy bir rettik járdemaqy alady. Basqa óńirlerde ortasha tólem mólsheri 150 myń teńgeniń aınalasynda. Sondaı-aq elimizdegi Lenıngrad turǵyndary, konslagerdiń kámeletke tolmaǵan tutqyny atanǵandar, soǵysta qaza tapqan jaýyngerlerdiń jubaılary, tyl ardagerleri men basqa da soǵysqa qatysýshylarǵa teńestirilgender de túrli mólsherdegi bir rettik tólem alady.
Budan keıin soǵys ardageri A.Bekmadı sóz sóılep, beıbit ómirdiń mańyzyna toqtalyp, soǵys bolmasyn degen tilegin jetkizdi.
«Soǵys ardageri retinde maǵan úsh bólmeli páter berdi. Jolda tegin júremin, endi ne kerek maǵan?! Osyndaı qurmet kórsetkeni úshin elime, Elbasyna alǵys aıtamyn. Bizdiń maqsatymyz – beıbit ómir súrý», dedi qarııa.
Jıyn sońynda A.Bekmadıge baǵaly syılyqtar berildi.
Abaı ASANKELDIULY,
«Egemen Qazaqstan»
