Reıhstagqa tý tikken qazaq, Halyq Qaharmany Raqymjan atasy 1924 jyly 19 qazanda ómirge kelse, kishkentaı Qoshqarbaev 2013 jyly 19 qazanda dúnıe esigin ashypty. Tegi men týǵan kúni sáıkes kelip turǵan ulǵa ata-anasy, baýyrlary yrym etip, qaharman atanyń esimin enshiletti. Árıne qart Raqymjannyń taǵdyry emes taǵylymy, batyrlyǵy, azamattyǵy men qaısarlyǵy darysyn degen tilek, halyq úshin keýdesin oq pen otqa tósep, eren erlik úlgisin kórsetken batyr babaǵa degen sheksiz qurmet. Búginde kishkentaı Raqymjan Aqtaý qalasyndaǵy «Sultan» atty balabaqshaǵa barady. «Bala tili – bal» degendeı, «Men Nursultan baqshasyna baramyn!» deıdi maqtanyshpen. Aqyldy, jigerli, baısaldy, belsendi bala balabaqshada ótetin túrli sharalarda aldyńǵy lekte júredi.
– Este saqtaý qabileti óte joǵary, alǵyr. Teledıdardan bir kórgen nárseni sol kúıinde qaıtalap bergende, ózimiz qaıran qalamyz. Eń bastysy, aman bolsyn, elin súıgen azamat bolsyn, – deıdi ákesi Qanat Jumabaev. Qanat Qoshqarbaıuly – jattyqtyrýshylar arasynda sambo kúresinen úsh dúrkin Álem chempıony, qazaq kúresinen birneshe dúrkin túıe balýan, halyqaralyq dárejedegi sport sheberi. Qazirgi tańda Aqtaý qalalyq ákimdiginde qalalyq sport bóliminiń basshysy bolyp qyzmet atqaryp júr. Ol ulynyń ózi sekildi sportshy bolǵanyn qalaıdy, alaıda qaı sport túrin balanyń yńǵaıyna, qabiletine qaraı anyqtamaq.
Erkin elimizdiń erteńine qyzmet eter jetkinshekter jelkildep jetile bergeı, dedik biz de áke tilegine ortaqtasyp.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
