Baspasóz máslıhatynda Aqparat jáne kommýnıkasııalar vıse-mınıstri Nurgúl Maýberlınova bıyl «Úrker» syılyǵy «Qazaq» gazetiniń 105 jyldyǵyna arnalyp otyrǵandyǵyn aıtty.
«О́tken jyly Aqparat jáne kommýnıkasııalar mınıstrligi «Tumar» jáne «Úrker» syılyqtaryn taǵaıyndaǵan bolatyn. Bıyl naýryz aıynda ótken «Tumar» ulttyq syılyǵy Qazaq televızııasynyń 60 jyldyǵyna arnalǵan edi. Al «Úrker» syılyǵyn «Qazaq» gazetiniń 105 jyldyǵyna arnaýdy josparlap otyrmyz», dedi ol.
Sonymen bıyl «Úrker» baıqaýyna qatysý úshin úmitkerler el.kz. saıtyna úzdik fotosýret, úzdik reportaj, úzdik saraptamalyq materıal, úzdik jýrnalıstik zertteý, úzdik suhbat, Qazaqstan týraly úzdik tanymdyq materıal, úzdik halyqaralyq taldamaly materıal, úzdik óńirlik radıostansa, úzdik óńirlik merzimdi basylym, úzdik qazaqstandyq radıostansa, úzdik ınternet-basylym, úzdik respýblıkalyq merzimdi basylym atalymdary boıynsha ótinishter jibere alady.
Bul týraly «Qazcontent» AQ tóraǵasy Evgenıı Kochetov: «Bıyl baıqaý 12 atalym boıynsha ótedi jáne taǵy bir eksperımenttik atalym qosylyp otyr. Eń úzdik blogerler men vaınerlerdi, sondaı-aq eń tanymal pablık pen jyl haıpyn anyqtasaq degen oı bar. Ádil bolsyn degen nıetpen oqyrmandar ózderi tańdasyn degen sheshimge keldik. Sol úshin qosymsha qandaı atalym bolatynyn daýys berý arqyly anyqtamaqpyz. Muny kópshilik urker.el.kz saıtyna kirip, atalymǵa daýys berý arqyly tańdaıdy», dedi.
Baıqaýdyń qazylar alqasy quramyna tanymal qoǵam qaıratkerleri men shyǵarmashylyq zııaly qaýym ókilderi, jýrnalıstıka salasynyń maıtalman mamandary kiredi. Laýreat atanǵan jýrnalısterge estelik músin men qarjylaı júlde tabystalady. Árbir jeńimpaz 1 000 000 teńge kóleminde aqshalaı syılyq pen dástúrli estelik músinge ıe bolady. Konkýrsqa shyǵarmashylyq jumystary 2017 jyly jarııalanǵan baspasóz redaksııalary men ınternet-BAQ ókilderi, sondaı-aq radıostansalardyń jýrnalısteri qatysa alady.
Baspasóz máslıhatynda spıkerler jýrnalıster saýaldaryna jaýap berip, byltyr konkýrsqa 700-ge jýyq ótinim túskenin, sóıtip baıqaý joǵary dárejede ótkenin tilge tıek etti. Sondaı-aq bıylǵy qatysýshylarǵa sáttilik tiledi.
Ularbek NURǴALYMULY,
«Egemen Qazaqastan»
