Aldaǵy jeksenbi kúni AQSh-ta jeńil salmaqtaǵy (61,2 kg) Vasılıı Lomachenko (10-1, 8 KO) men Horhe Lınares (44-3, 27 KO) álem chempıony ataǵy úshin jekpe-jek ótkizedi. Keshe eki boksshy da jekpe-jek aldynda ashyq jattyǵý ótkizip, aıqas aldyndaǵy pikirlerin aıtty.
Lınares: «Meni alda tek jeńis kútip tur. Lomachenkomen jekpe-jekte álem chempıony ataǵymdy saqtap qalǵym keledi. Bul meniń kareramdaǵy óte mańyzdy aıqas. Sondyqtan ózimniń myqty ekenimdi dáleldeýim kerek. Men óz kúshime jáne jeńiske jetetinime senemin».
Lomachenko: «Esimimdi boks tarıhyna altyn árippen jazǵym keledi. Jankúıerler meni birneshe ǵasyr boıy umytpaı, eske alyp júrý úshin men ártúrli salmaqtaǵy chempıondarmen jekpe-jek ótkizýim kerek. Sonyń biri – Lınares. Ol maǵan qandaı qarsylyq kórsetetinin bilmeımin. Biraq ony Rıgondomen salystyrǵym kelmeıdi. Lınares bul salmaqtaǵy úzdik boksshynyń biri. Sondyqtan ony jeńý de ońaı emes».
«Shrek» AQSh-qa ketýi múmkin
Fýtboldan Anglııa jáne «Everton» klýbynyń shabýylshysy Ýeın Rýnı osy maýsym sońynda AQSh-tyń MLS lıgasyna
aýysýy múmkin. Bul týraly The Washington Post saıty habarlady.
«Everton» klýbynyń shabýylshysy qazirdiń ózinde «Dı Sı Iýnaıted» komandasynyń ókilderimen kelissózder júrgizip jatyr. Derekkózdiń málimetinshe, «Shrek» degen laqap atqa ıe 32 jastaǵy Ý.Rýnı amerıkalyq klýbqa aýysýǵa jaqyn.
Qazir «Dı Sı Iýnaıted» MLS lıgasynyń Shyǵys konferensııasynda sońǵy orynda keledi. Atalmysh klýb Rýnıge ótken jyly qolqa salǵan, alaıda ol mansabyn Anglııada jalǵastyrýdy sheshken.
«Dı Sı Iýnaıted» komandasy buǵan deıin Chıcharıto («Vest Hem»), Karlos Teves («Boka Hýnıors») jáne Marıo Balotellı («Nıssa») sekildi fýtbolshylardy da satyp alǵysy keletinin habarlaǵan-dy.
Fýtbolshyǵa boksshy lısenzııasy berilmedi
Fýtboldan Anglııa quramasy men «Manchester Iýnaıted» komandasynyń eks-oıynshysy Rıo Ferdınandqa Brıtanııanyń boks komıteti (BBBofC) kásipqoı boksshy lısenzııasyn berýden bas tartty.
«Kásipqoı boksshy lısenzııasyn bermegenin óte aýyr qabyldadym», dedi Rıo Ferdınand komıtettiń shyǵarǵan sheshimine narazylyq tanytypty. Ferdınand fýtboldaǵy mansabyn aıaqtaǵannan keıin, 2 jyl boıy bokspen shuǵyldanǵan. Ol buǵan deıin sharshy alańda bir jekpe-jek ótkizýdi armandaıtynyn aıtqan edi.
«Men bokstaǵy uzaq mansapty qalamaımyn. Tek bir ǵana jekpe-jek ótkizgim keledi. Qalǵanyn ári qaraı kóremiz. Bálkim, boks maǵan unap, osy sportty serik etýim múmkin», degen-di ol.
Daıyndaǵan
Álı BITО́RE,
«Egemen Qazaqstan»
