Abaı atyndaǵy Qazaq Ulttyq pedagogıkalyq ýnıversıteti uıymdastyrǵan óner saıysy «Abaı óleńderi», «Abaıdyń qara sózderi» jáne «Abaı ánderi» baıqaýlary boıynsha júrgizilip, oǵan elimizdiń 22 joǵary oqý ornynan 106 úmitker qatysty.
Festıvaldiń ashylý rásiminde ýnıversıtet rektory Takır Balyqbaev bilim ordasynda uly aqynnyń ádebı murasyn nasıhattaý baǵytynda atqarylyp jatqan jumystar týraly aıtyp, qatysýshylarǵa sáttilik tiledi.
Saıysqa belgili ádebıettanýshy ǵalymdar, mádenıet jáne óner qaıratkerleri, kásibı ánshi-sazgerler qazylyq etti. Atap aıtqanda, «Abaı óleńderi» baıqaýy boıynsha fılologııa ǵylymdarynyń doktory, professor Mekemtas Myrzahmetuly, «Abaıdyń qara sózderi» baıqaýy boıynsha «Hákim Abaı» ǵylymı-zertteý ortalyǵynyń dırektory Jabal Shoıymbet jáne «Abaı ánderi» baıqaýy boıynsha Qazaqstannyń eńbek sińirgen qaıratkeri, ánshi-kompozıtor Arman Dúısenov qazylar alqasyna tóraǵalyq jasady.
Qyzdar Ýnıversıtetiniń «Mádenı-tynyǵý» mamandyǵynyń 2-kýrs stýdentterinen quralǵan «Daryn» dýeti «Abaı ánderi» baıqaýy boıynsha ózgelerden úzdik atanyp, birinshi orynǵa ıe boldy. Ekinshi oryn Abaı atyndaǵy Qazaq Ulttyq pedagogıkalyq ýnıversıtetiniń stýdenti Olesıa Homenkoǵa buıyrsa, júldeli úshinshi oryndy Abaı atyndaǵy Qazaq Ulttyq pedagogıkalyq ýnıversıtetiniń stýdenti Tájmına Danııarqyzy men Jáńgir han atyndaǵy Batys Qazaqstan agrotehnıkalyq ýnıversıtetiniń stýdenti Aqmaral Nurǵazıeva ózara bólisti.
– Saıystyń alǵashqy aınalymynda «Aıttym sálem qalamqas» ánin oryndasaq, ekinshi týrda Latıf Hamıdıdyń «Bulbul» ánin aıtyp synǵa tústik. Nátıjesinde qazylar alqasy tarapynan joǵary baǵa alyp, úzdik nátıjege qol jetkizdik, Hákim Abaıdyń ómiri men shyǵarmashylyǵyn jastar arasynda keńinen nasıhattaý maqsatynda osy sııaqty óner baıqaýlarynyń mańyzy zor dep bilemiz, – deıdi Qyzdar Ýnıversıtetiniń stýdentteri.
Shara sońynda jeńimpazdar syıaqy jáne dıplomdarmen marapattaldy. Aıta keteıik, óner festıvaline stýdentterdi О́ner jáne mádenıet fakýltetiniń oqytýshylary Alpysbaı Kópbaev pen Ulbosyn Belǵozıeva daıyndady.
