- Árbir adam úshin baspananyń mańyzy zor. Táýelsizdik jyldary elimizde memleket basshysynyń basshylyǵymen qazaqstandyqtardy baspanamen qamtamasyz etý úshin kóp dúnıe jasaldy. Buǵan osy shaǵyn aýdan dálel. Birneshe jyl buryn munda dalalyq bolatyn, al qazir myńdaǵan páterler salynǵan. Prezıdenttiń bes áleýmettik bastamalasynda aıtylǵan negizgi maqsattardyń biri de baspanamen qamtamasyz etýge baǵyttalǵan. Byltyr biz oblysta nebári 790 myń sharshy metr turǵyn úıdi paıdalanýǵa berdik, bıyl kem degende 850 myń sharshy metrdi paıdalanýǵa beremiz. Bizdiń basty maqsatymyz – baspanaǵa muqtaj aqtóbelikterdi, sonyń ishinde Turǵyn úı qurylys jınaq bankiniń 80 myń salymshysy men kezekte turǵan azamattardy turǵyn úımen qamtamasyz etý,-dedi óńir basshysy.
О́z kezeginde, Lázzat Ibragımova Aqtóbe oblysynyń turǵyn úıdi tapsyrý jaǵynan kóshbasshy ekenin atap ótti.
- Aǵymdaǵy jyldyń sońyna deıin qoldanystaǵy 2133 páterden basqa, taǵy da 1 655 páterdi tapsyrý josparlanýda. Memlekettik baǵdarlamany tabysty iske asyrý oblys ákimdigi jumysynyń nátıjesi bolyp tabylady. Bank, óz kezeginde, adamdarǵa qoljetimdi nesıeler berý arqyly turǵyn úıdi satyp alýǵa kómektesedi. Endi «Nurly Jer» baǵdarlamasynyń aıasynda nesıe alý ońaıyraq bolady. Bank bastapqy jarnany 30% -dan 20% -ǵa deıin tómendetý boıynsha memlekettik baǵdarlamaǵa ózgerister engizdi. Aldaǵy aıda jańa ereje jumys isteı bastaıdy, - dep túsindirdi ol.
- Turǵyn úı alabynda (Nur Aqtóbe) jańa úıler salyndy. Turǵyn úıler Turǵynúıqurylysjınaq banki salymshylaryna 1 sh.m. 110 000 – 120 000 teńge baǵasymen satylady jáne bul baǵa «Nurly jer» baǵdarlamasynan tómen.
Páterlerdi teksergennen keıin oblys ákimi men TÚQJB basshysy jańa qonystanýshylarmen birge aǵash otyrǵyzý jumystaryna qatysty. Turǵyn úılerdiń aldaryna júzden astam qylqan japyraqty kóshetter otyrǵyzyldy.
Temir Qusaıyn,
"Egemen Qazaqstan"
