Egemendik aınasy

Elordadaǵy Ulttyq akademııalyq kitaphanada Astana qalasynyń Muraǵattar jáne qujattamalar basqarma­sy­nyń uıymdastyrýymen Táýelsizdigimizdiń 20 jyldyǵyna oraı kásibı fotosýretshi Shúkir Shahaıdyń «Egemendik aınasy» atty fotoalbomynyń tusaýkeseri bolyp ótti. Sýret – zaman men qoǵamnyń, adam men ýaqyttyń kóz­ge kórine bermeıtin syıqyrly baılanysyna qanat bitiretin, júrekterge qapysyz jol tabatyn ǵajaıyp óner desek, aqyn, Memlekettik syılyqtyń laýreaty Nurlan Orazalınniń alǵysózinde jazylǵandaı, mańyzy men máni zor tarıhı sýretterden turatyn qalyń kitap jıyrma jyl ishindegi el ómiriniń aınasy ispetti. Albomdyq sıpatta jasalyp, polıgrafııalyq ásem úlgide bezendirilgen sýret-jádigerler – ult, urpaq jadyn qaıyra qozǵap, ót­ken kúnder tasasynan el shejiresine til bitireri haq. El­basynyń týǵan eliniń aldynda ant berip turǵan sáti, jurty­nyń táýelsizdik deıtin kıeli de qasıetti uǵymdy kókiregine tumar qyp túıýiniń alýan-alýan kórinisteri, egemen el ómiriniń jeńisi men jemisin qatar elesteter hronologııalyq úlgidegi zamana belesterin elestetetin shejire kórinister eshkimdi de beı-jaı qaldyrmasy anyq. Sheber túsirilgen órnekti sýretter ári kórkem, ári shy­naıy. Bir sát ótkenge oraltyp, oıyńnyń órisin ke­ńeı­tedi, tanymyńdy qalyptastyryp, tálimińdi te­reń­detedi. Bir kezdegi zaman tynysynyń qadaý-qadaý óz­geris­teri men aı­ryq­sha kezeńderin tap basyp saralaýǵa, taldaýǵa kómektesedi. Iá, fotoalbomnan biz táýelsiz Qazaqstannyń sońǵy jıyrma jyl aralyǵyndaǵy Almaty men Astana arasyn jalǵap jatqan eldiktiń, erliktiń shejiresin kóremiz. Ýaqyt tynysyn ańǵartar sýret-jádigerler elimizdiń erlikke, eńbekke toly ótkeni men búgingi tolyqqandy keskinin elestetedi. Iаǵnı, Qazaqstandaǵy táýelsizdik dáýiri alyp kelgen oń ózgeristerge den qoıǵysy keletin kez kelgen adamnyń aıtýly kitaptan tabar oljasy da, alar ǵıbraty da mol. Fotoalbomnyń tusaýkeser rásiminde Qajahmet Balahmetov, Toqtar Áýbákirov, Jandarbek Málibekuly, Baqyt Syzdyqova, Tilegen Sadyqov, Serik Kamaluly sııaqty qoǵam qaıratkerleri kitaptyń mán-mańyzyna toqtalyp, fotosýretshige aldaǵy ýaqyttarda da óner­diń óreli bıiginen kórine berýine tilektestik bildirdi. Berik SADYR.