Ekologııalyq naýqanǵa Astana ákimi Áset Isekeshev, QR Parlamenti Senaty men Májilisiniń tóraǵalary Qasym-Jomart Toqaev pen Nurlan Nyǵmatýlın, «NurOtan», «Aqjol», QKHP partııalary parlamenttik fraksııalarynyń depýtattary, Májilis apparatynyń qyzmetkerleri de qatysty. Olar Orynbor kóshesinde ornalasqan «Zelenyı kvartal» turǵyn úı kesheni aýdanynda aǵash otyrǵyzdy.
«Búgin barlyǵymyzdyń kóńil-kúıimiz jaqsy. Senbilik Astananyń 20 jyldyǵy sııaqty tamasha merekeniń qarsańynda ótip jatyr. Árıne, mundaı sharaǵa óz úlesimizdi qýana qosqymyz keledi. Qalamyzdy abattandyrý, onyń kórkin keltirý jumystarynda seniń de kishkentaı eńbegińniń bar ekendigin bilý erekshe kúıge bóleıdi emes pe?!» - deıdi QR Parlamenti Májilisiniń depýtaty Irına Aronova.
Naýqanǵa qatysýshylar 120-ǵa tarta aǵash kóshetterin otyrǵyzdy. Endi Astananyń sol jaq jaǵalaýyna terek, shaǵan, sheferdııa sııaqty aǵashtar kórik bermek.
Keń aýqymdy senbilikti ótkizýge qatysty bastamany eńbektegen sábıden eńkeıgen qarııaǵa deıin qoldady. Qala kóshelerin tazartýǵa kóptegen otbasylar, ujymdar shyqty. Olardyń arasynda memlekettik mekemelerdiń, qoǵamdyq birlestikterdiń qyzmetkerleri, áleýmettik jelilerdegi «Astana – Chto? Gde? Kogda?», «Astana, hochý pohvalıt/ hochý pojalovatsıa» atty qaýymdastyqtardyń jazylýshylary da bar.
Ekologııalyq naýqan barysynda barlyǵy 17 313 aǵash egiledi dep josparlanǵan.
9 sáýir men 10 mamyr aralyǵynda elorda aýmaǵynan 4 227,74 tonna qaldyq shyǵarylyp, 9 sáýir men 9 mamyr aralyǵynda 8 065 aǵash otyrǵyzyldy.
