Is-sharany ashý barysynda Májilis Tóraǵasynyń orynbasary V. Bojko Memleket basshysy, Joǵarǵy Bas qolbasshy Nursultan Ábishuly Nazarbaevtyń elimizdiń qorǵanys-ónerkásip keshenin damytý jáne ony qoldaý máselelerine erekshe nazaryn eskere otyryp, ótkizilip otyrǵan is-sharanyń mańyzdylyǵyna toqtaldy.
Is-sharaǵa Májilis depýtattary, Ulttyq qaýipsizdik komıteti, Bas Prokýratýra, Respýblıkalyq bıýdjettiń atqarylýyn baqylaý jónindegi esep komıteti, Qorǵanys jáne aeroǵarysh ónerkásibi, Syrtqy ister, Qorǵanys, Ishki ister, Bilim jáne ǵylym, Investısııalar jáne damý mınıstrlikteri, ákimdikter men qorǵanys ónerkásibi kesheni kásiporyndarynyń ókilderi qatysty.
Qorǵanys jáne aeroǵarysh ónerkásibi mınıstri Beıbit Atamqulov Qazaqstan Respýblıkasynyń qorǵanys ónerkásibi kesheniniń qazirgi kezeńdegi jaı-kúıi men damý perspektıvalary jáne osyǵan baılanysty mınıstrliktiń aldyna qoıǵan mindetteri jaıly egjeı-tegjeıli aıtyp ótti.
Qosymsha baıandamamen sóz sóılegen beıindi Komıtettiń tóraǵasy Muhtar Erman qorǵanys ónerkásibi saıasatyn qazirgi kezeńde júzege asyrýdyń birqatar mańyzdy aspektilerin aıqyndady.
Depýtat olardyń ishinde Parlament Májilisimen «Qorǵanys ónerkásibi men memlekettik qorǵanystyq tapsyrys týraly» zań jobasy aıasynda qaralyp otyrǵan, qorǵanys ónerkásibi keshenin damytý úshin mańyzdy bolyp tabylatyn negizgi aspektilerge erekshe nazar aýdardy.
Sonymen qatar, qorǵanys ónerkásibi kásiporyndaryn jańǵyrtýda memlekettik-jekemenshik áriptestik tetikterin neǵurlym belsendi paıdalaný, bıýdjet qarajatyn tıimdi paıdalaný, áskerı-tehnıkalyq yntymaqtastyqty jandandyrý, qorǵanys ónerkásibi kesheni úshin kadrlardy daıyndaý qajettiligi jáne basqa da máseleler aıtyldy.
Pikirsaıysqa qatysqan Májilis depýtattary baıandamashy men shaqyrylǵan memlekettik organdardyń basshylaryna birqatar máselelerdi alǵa tartty. Depýtat Qabıbolla Jaqypov memlekettik qorǵanystyq tapsyrystyń qalyptasýy jóninde surasa, depýtat Pavel Kazansev vedomstvolar arasynda ǵylymı-zertteý salasyndaǵy ózara árekettestik máselelerine basa nazar aýdardy. Depýtat Natalıa Jumadildaeva qorǵanys ónerkásibi kesheni úshin kadrlardy daıyndaý jóninde suraq qoıdy. Parlament músheleri Nurlan Dýlatbekov pen Janat Jarasov Ulttyq Ulan men Shekaralyq Qyzmet bólimshelerin otandyq áskerı ónimmen qamtamasyz etý aspektilerine qatysty máselelerdi kóterdi.
Qyzý talqylaýda sóz jarystyrǵan Májilis depýtattary Abaı Tasbolatov jáne Qudaıbergen Erjan qorǵanys ónerkásibi keshenin damytýdyń birqatar basym aspektilerine nazar aýdardy.
Úkimet saǵaty qorytyndysyna oraı memlekettik organdar úshin Qazaqstan Respýblıkasy qorǵanys ónerkásibi keshenin damytý jóninde atqarylyp jatqan jumystyń tıimdiligin arttyrý boıynsha Qazaqstan Respýblıkasynyń Úkimetine jiberiletin usynymdar ázirlendi.
