Oblystyq kásipkerlik palatasy dıqandarǵa kómektesýdiń taǵy bir tásilin tapty. О́ńirde «Tyńaıtqyshtardy tıimdi paıdalaný jáne kúrish ónimdiligin arttyrý» taqyrybynda ótken semınarda «tegin keńes» berý qyzmeti qolǵa alynatyndyǵy habarlandy.
Bul maqsat úshin onsyz da jetpeı jatqan agronomdardy ana sharýashylyqtan myna sharýashylyqqa tartqylamaıdy. Zeınetke shyqqan agronomdar jumysqa alynbaq. Olarǵa keńseden orynjaı berilmek. Dıqan keńsege kelip, aptasyna eki ret tegin keńes ala alady. Qajet bolǵan jaǵdaıda egis basyna aparyp, daqylynyń jaıyn kórsetip qajetti nusqaýlaryn tyńdaıdy.
Bul árıne kásipkerlik palatasynyń aýadan alyp otyrǵan aqyly emes. Mundaı jaqsy úrdis aýyl sharýashylyǵynan mol ónim jınap otyrǵan Eýropa elderinde jolǵa jaqsy qoıylǵan. Onda zeınettegi agronomdar kelisim-shartpen jumys jasaıdy.
Oblystyq kásipkerler palatasynyń bólim basshysy Jasulan Serikov: «Osyndaı jol arqyly sharýashylyqpen aınalysyp jatqan jastarǵa qoldaý kórsetemiz, tájirıbesin baıytamyz», deıdi.
Nesi bar, úırenetin úrdis. Aýyl sharýashylyǵy qatty damyǵan Gollandııa elinde kúnine 60 lıtr sút bere almaǵan sıyr qasaphanaǵa ketedi eken. Al aýyldaǵy qyz-kelinshekter kúnine on lıtr bermeıtin sıyrlarynyń shandyr jelinin qaqtap áli otyr.
«Úıren de jıren» deıdi halyq danalyǵy. Zeınetke shyqqan, tájirıbesi tolysqan keshegi mamannyń kómegi búgingi jas býynǵa ábden kerek. Áıtpese daqyldy seýip tastap, «alma pis, aýyzǵa tús» paıda bergen emes. Kásipkerler palatasynyń bul izdenisin jaqsylyqqa baladyq.
Baqtııar TAIJAN,
«Egemen Qazaqstan»
Qyzylorda oblysy
