Saltanatty sharaǵa jınalǵandar aldynda ýnıversıtet rektory, medısına ǵylymdarynyń doktory, professor Talǵat Nurǵojın men SANTO kompanııasynyń bas dırektory Ijı Ýrbanes quttyqtaý sóz sóıledi.
Memorandýmǵa qol qoıyp jatyp, eki taraptyń ókilderi teńdeı quqyq jáne ózara paıda bolý qaǵıdasyna sáıkes, ǵylymı-tehnıkalyq yntymaqtastyqty damytyp jáne ony júzege asyrý úshin uıymdastyrý jaǵynan da qarjylaı qoldaý turǵysynan da jaǵdaı jasaýǵa yqylasty ekenin bildirdi.
Atap aıtqanda, bilim berý aıasyndaǵy yntymastyq aıasynda birlese bilim berý baǵdarlamasyn daıyndaý josparlanǵan. О́z tarapynan SANTO kompanııasy ýnıversıtet stýdentterine taǵylymdamalar uıymdastyrýdy, tájirıbelik semınarlar men konferensııalardy, ǵylymı zertteýler ótkizýdi josparlap otyr. Sondaı-aq, memorandým aıasynda halyqaralyq jýrnaldarda zertteý nátıjelerin jarııalaý, bos jumys oryndary jármeńkesin uıymdastyrý men zamanaýı medısınanyń ózekti máselelerin sheshý úshin ózara kúsh biriktirý kózdelgen.
«Qazaqstannyń jetekshi medısınalyq ýnıversıtetteriniń biri búgin bizdiń seriktesimizge aınalyp otyrǵanyna men asa qýanyshtymyz, – dedi Ijı Ýrbanes myrza. – Sondaı-aq, ýnıversıtettiń basketbol jáne voleıbol komandalaryna arnap sport kıimderin, sport jabdyqtaryn satyp alýǵa kómekteskenimizdi de qýana jetkizgim keledi. Yntymaqtastyqqa bastaǵan osy alǵashqy qadamymyzdy ary qaraı da jemisti túrde damytýǵa daıynbyz. Búgin jańa memorandýmǵa qol qoıyp otyrǵanymyz – biz úshin aıtýly oqıǵa, óıtkeni bıyl bizdiń «SANTO akademııalyq baǵdarlamamyzǵa» 5 jyl toldy. Osy kezeńde biz Astana medısınalyq ýnıversıtetimen, Nazarbaev Ýnıversıtetimen, Ońtústik Qazaqstan medısınalyq akademııasymen, Shymkent qalasyndaǵy hımııa-bıologııa baǵytyndaǵy Nazarbaev zııatkerlik mektebimen, Dárilik zattardy saraptaý ulttyq ortalyǵymen, Ońtústik Qazaqstan oblysy óńirindegi Kásipkerler palatasymen tabysty yntymaqtastyq ornattyq. Memorandýmdar aıasynda stýdentter, mektep oqýshylary, ǵalymdar kompanııanyń Qazaqstandaǵy jáne Polshadaǵy óndiristik qýattylyqtaryn, zertteý júrgizetin zerthanalaryn kórip qaıtýǵa múmkindik alyp, keleshegi mol ǵylymı jumystary úshin granttarǵa ıe bolyp otyr».
Oraıy kelip turǵanda, densaýlyq saqtaý salasyndaǵy memlekettik-jekemenshik seriktestikti júzege asyrý úshin 2013 jyly kompanııanyń «SANTO akademııalyq baǵdarlamasy» atty basty bilim berý jobasy qolǵa alynǵanyn aıta ketýge bolady. Joba QR Prezıdenti Nursultan Nazarbaevtyń 2013 jylǵy 22 mamyryndaǵy Sheteldik ınvestorlar keńesinde belgilengen baǵytqa sáıkes, farmasevtıkalyq ónerkásip sapasyn halyqaralyq standarttar deńgeıine deıin kóterýdi kózdeıdi. Elbasy óz sózinde ınnovasııalardy qajetti kadrlarmen qamtamasyz etý, halyqaralyq deńgeıdegi biliktiligi bar ınjenerlik, tehnıkalyq kadrlarǵa degen qajettilikti qanaǵattandyrý úshin bilim berý júıesin ıkemdeý qajettigin, sondaı-aq, oqý josparlary men ádistemelerdi qalyptastyrýǵa bıznesti qatystyrý, jergilikti mamandar qatarynan joǵary kásibı kadrlar quramyn qalyptastyrý úshin sheteldik mamandardy tartý qajet degen oıdy erekshe atap ótken bolatyn.
Aınash ESALI,
«Egemen Qazaqstan»
