О́lke damýyna aıtýly úles qosqan qaıratker Amanbek Túsiphanuly Ábdihanovty eske alý qurmetine voleıboldan erler arasyndaǵy týrnırge aldy Qyrǵyzstannan kelgen, Astanadan, Pavlodardan, Temirtaýdan, Balqashtan jáne basqa qalalardan jınalǵan 14 komanda qatysty. Sharýashylyq dırektory, Jańaarqa, Abaı aýdandarynyń ákimi kezinde sportqa da qamqorlyq jasaýǵa, aýyl jastarynyń voleıbolǵa degen yqylasyn serpiltýge, qushtarlyǵyn kúsheıtýge den qoıǵan azamat atyndaǵy jarys mártebesi jyldan-jylǵa ósip otyr.
Munyń aldynda jer-jerde ótken irikteý oıyndarynda ozyp shyqqandar 4 topqa bólinip, básekege tústi. Qaı-qaısy da ońaı shaǵyla qoımaıtyn jańǵaq emestigin kórsetip, tartysty qyzdyrdy. Degenmen shyn sheberlik moıyndatpaı tura ma! Jeńis tuǵyryna kóterilý úshin sheshýshi kezdesýde Astana qalasynyń qurama qomandasy pavlodarlyq qarsylastaryn tize búktirdi. Jeńimpazǵa arnaıy Kýbok tapsyrylyp, bas júldege tigilgen syılyq tabys etildi. Úzeńgiles básekelester de, úzdik dep tanylǵan oıynshylar da syı-sııapattan qur alaqan qalmady.
– Úrdiske aınalǵan bul týrnır aýyl, qala jastaryn dop oıynynyń osynaý bir tamasha túrimen shuǵyldanýǵa tartyp keledi. Ony uıymdastyrýdyń alǵashqy jyldarynda biren-saran ǵana komanda qamtylsa, qazir kópshiligi odan qalys qalmaýǵa tyrysady. Sondyqtan Áýesqoı Voleıbol Lıgasyn quryp, kúzden qysqa deıin voleıbol boıynsha maýsymdyq oıyndar ótkizilip turatyn boldy, – dedi Qaraǵandy qalasy voleıbol federasııasynyń jetekshisi Kenjeǵul Túsiphanov.
Sondaı-aq jarys barysynda málim etilgendeı atalǵan týrnır kelesi jyly oblystyq dene tárbıesi jáne sport basqarmasynyń tikeleı qoldaýymen resmı túrde respýblıkalyq mańyzy bar deńgeıde ótkiziletin boldy. Demek, boks pen kúresten dańqy asqan Qaraǵandynyń voleıbol arqyly da ataǵy jańǵyrýyna áseri zor bolmaq. «О́negeniń órisi keń» degen osy. Úlken voleıbolǵa jol salǵan úrdis yqpaly bul.
Aıqyn NESIPBAI
QARAǴANDY
