Jıyn kezinde bilim berý jáne medısına salalaryna sıfrlyq tehnologııany engizý suraqtary egjeı-tegjeıli qaraldy.
Oblys ákiminiń orynbasary Erbol Nurǵalıev málimdegendeı, birinshi kezeńde josparlanǵan barlyq 32 medısına mekemesine aqparattyq júıe engizilgen. Ol dáriger, basshy men emdelýshi úshin standarttar men málimetter qorynyń birligin qamtamasyz etýge múmkindik beredi. Densaýlyq saqtaý salasyn ári qaraı sıfrlandyrý maqsatynda «Damý Med» mobıldi qosymshasyn, qabyldaýǵa elektrondy túrde jazylý jáne dárigerdi úıge shaqyrý qyzmetterin keńinen damytý jalǵasýda. Budan basqa, oblys halqynyń 20% -nyń nemese 169 myńǵa jýyǵynyń densaýlyqtyń elektrondy tólqujaty toltyryldy.
Oblys mektepteriniń shamamen jartysynan astamy nemese 46 paıyzy «Kúndelik kz» elektrondy jýrnal men kúndelik júıesine qosylǵan.
Sonymen qatar Erbol Nurǵalıev bıylǵy jyly mektepterdi odan ári kompıýterlendirý úshin 1700, medısınalyq mekemelerge 1056 kompıýterler satyp alynǵanyn habarlady.
Júıe qaǵaz qujat aınalymynyń kólemin azaıtyp, muǵalimderdiń ýaqytyn únemdep jáne ata-analarǵa oqý qyzmetiniń ashyqtyǵyn arttyrady. Oqý úlgerimi jáne qatysymy týraly barlyq aqparat onlaın túrinde qoljetimdi.Jıynǵa qatysýshylar bilim berý mekemeleriniń joǵary jyldamdyqty ınternetke qol jetimdiligi máselesine basa nazar aýdardy.
Jyl sońyna deıin aımaqtyń 60 paıyz mektebin sekýndyna 12-16 Mbıt jyldamdyqpen qamtamasyz etý josparlanýda.
Oblys ákimi taǵy da «Sıfrlyq Qazaqstan» aıasynda engizilgen barlyq aqparattyq júıelerdi tolyq ıntegrasııalaý qajettigine nazar aýdardy.
-Sońǵy eki aıda oblys kóleminde sıfrlandyrý qarqyny báseńdep ketti.Aldynda josparlanǵan ındıkatorlar jetistigi boıynsha tolyqtaı baqylaýǵa alyp belsendiligin arttyrý qajet, -dedi oblys ákimi jıyndy qorytyndylaı kele.
Temir Qusaıyn,
«Egemen Qazaqstan»
Astana
