HI Astana ekonomıkalyq forýmy aıasynda «Artyqshylyq ornyna quqyq. Áıelder kóshbasshylyǵy qazirgi álemge qalaı áser etýi múmkin?» atty dóńgelek ústel otyrysy ótti.
Is-sharany Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń qoldaýymen «EXPO & Women» halyqaralyq uıymy Qazaqstandaǵy «BUU-Áıelder» qurylymymen birlesip uıymdastyrdy.
Sondaı-aq, jıynǵa memlekettik organdardyń, halyqaralyq uıymdardyń ókilderi, sheteldik jáne ulttyq sarapshylar qatysty.
Otyrysty ashqan Gúlshara Ábdiqalyqova álemniń kóptegen damyǵan memleketteri áıel kapıtalyn damytý arqyly ınklıýzıvti ekonomıkany qalyptastyrý qajettigin túsingenin aıtty.
– Qazaqstannyń memlekettik saıasatynyń negizgi basymdyǵynyń biri – áıelder quqyǵyn qamtamasyz etý jáne ilgeriletý, sondaı-aq olardyń ekonomıkalyq múmkindikterin keńeıtý máseleleri bolyp sanalady, – dedi Memlekettik hatshy.
G.Ábdiqalyqova Nursultan Nazarbaevtyń «Sheshimder qabyldaý deńgeıinde áıelder ókildiginiń keńeıýine qol jetkizý qajet» degen sózin atap ótti.
Búginde Qazaqstannyń qarjy salasynda basshylyq qyzmettegi áıelderdiń sany 30 paıyzdan asty. Áıelder 500-den astam shaǵyn jáne orta bıznes kompanııalaryn basqarýda, ıaǵnı olardyń 43 paıyzyn qurap otyr. Osy sektorda qurylǵan barlyq jumys ornynyń úshten biri áıelderge tıesili.
Memlekettik hatshy áıelderdiń áleýeti men rólin arttyrý búkil álemniń ilgerileýimen tikeleı baılanysty ekenin atap ótti. Oǵan qol jetkizý úshin BUU usynǵan tórt K baǵytyna negizdelgen jańa mashyqtardy meńgerý qajet. Olar: synı oılaý, kollaboratıvtilik, kreatıvtilik jáne kommýnıkatıvtilik. Álem sarapshylarynyń boljamy boıynsha, 2020 jylǵa qaraı búgingi eńbek qyzmetin aıqyndaıtyn bilim men daǵdylardyń úshten birinen astamy ózgeretin bolady.
Jıyn qorytyndysy boıynsha genderlik meınstrımıngti ilgeriletý úshin saıasattaǵy, ekonomıkadaǵy jáne qoǵamdaǵy áıelder kóshbasshylyǵyn damytýǵa baǵyttalǵan usynymdar ázirlendi.
