Bıyl oblys óńirindegi kıeli oryndar, eskertkishterdiń birqatary jóndelip, qalpyna keltiriledi. Oǵan bıýdjetten tys 88,5 mıllıon teńge qarjy tartyldy. Barlyq kıeli oryndar kórkeıtiledi, sonyń ishinde aıyryqsha jóndeýdi qajet etetin ult ustazy Ahmet Baıtursynovtyń Torǵaıdaǵy, ıaǵnı Jangeldın aýdanyndaǵy týǵan úıi, Baraq batyr kesenesi jáne Qostanaı qalasyndaǵy Svıato-Nıkolskıı shirkeýi nazarǵa alynyp otyr. Olar kúrdeli jóndeýden ótedi.
Ahmet Baıtursynov týǵan úıdi osydan birneshe jyl buryn aldymen Arqalyq qalasyndaǵy Elena Sventýh basqaratyn «Jas ulan» balalar men jasóspirimder ortalyǵy uıymdastyrǵan tarıhı-tanymdyq ekspedısııa Ahań týǵan óńirdiń tarıhyn, onyń kindik qany tamǵan úıdiń taǵdyr-talaıyn jaqsy biletin aqsaqaldardy ertip baryp, qulap qalǵan tamnyń irgetasynan kesegin alyp, belgilep, keıinnen ony qalpyna keltirý týraly bastama da kótergen bolatyn. Birshama ýaqyt ótken soń Ahań urpaqtary turatyn Aqkól-Qarasý aýylynyń jastary asarlatyp, qulap, irgetasynyń orny ǵana qalǵan ǵımarattyń qabyrǵasyn qaıta turǵyzdy. Biraq qam kesekten salynǵan úı ýaqyt kóshine shydamaı, tozyp barady. Endi, mine, «Rýhanı jańǵyrý» baǵdarlamasynyń aıasynda úıdiń tolyq kúrdeli jóndeýden ótetini týraly jaqsy habar jurttyń kóńiline qýanysh uıalatty. Ol Torǵaı óńirine aıaq basqandardyń baryp kóretin, kemeńger adam kindiginiń qany tamǵan jerge taǵzym jasaıtyn orynǵa aınalatyn bolady.
Názıra Járimbet,
«Egemen Qazaqstan»
Qostanaı
Sýrette: Ahań úıiniń ornyna jasalǵan ekspedısııa músheleri jáne úıdi asarlatyp qalpyna keltirgen aýyl turǵyndary
