Bir ǵana «Jahandyq álemdegi zamanaýı qazaqstandyq mádenıet» jobasy aıasynda qazaq mádenıeti men ónerin jahanǵa nasıhattaý jolynda qyrýar jumystar júzege asyrylyp, sapaly nátıjelerge qol jetti. Mádenıet jáne sport mınıstrliginiń bastamasymen qolǵa alynǵan joba aıasynda qazaq óneri men mádenıeti álemdi sharlady. Reseı, Italııa, Fransııa, Túrkııa, Qytaı, Japonııa syndy talǵamy men taǵylymy egiz jasasqan talǵampaz elder qazaqtyń klassıkalyq mýzyka óneriniń jaýharlary – «Abaı», «Qyz Jibek», «Birjan-Saradaı» shyǵarmalardy tól saraptaýda tyńdaý men baǵa berý baqytyna ıe boldy. Álem Dımash Qudaıbergenov, Medet Shotabaev syndy daryndy ónerpazdar talantynyń arqasynda qazaqtaı qasıetti halyqtyń sheberligine bas ıdi. «Altyn adamnyń álem mýzeılerine sherýi» jobasy sheńberindegi «Uly daladaǵy kóshpendiler tarıhy» atty kórme negizinde ultymyzdyń kóne jádigerleri tórtkúl dúnıe nazaryna usynyldy. Sondaı-aq Nıý-Iork qalasynda ótken «PHOTOfest.KZ – gúldengen Qazaqstan álem fotosýretshileriniń kózimen» atty fotokórmede kúlli Amerıka Býrabaı, Qorǵaljyn, Baıanaýyl, Ulytaý, Qarqaraly, Túrkistan, Otyrar, Sharyn shatqaly, Shymbulaq, Medeý, Tamǵaly tas, Kólsaı syndy Otanymyzdyń tarıhy tereńdigimen taǵylymdy, tabıǵaty sulýlyǵymen kóz tartar ásem jerlerimen foto tili arqyly tanysýǵa múmkindik aldy. Kúni keshe Arqa tórinde shymyldyǵy túrilgen uly dýman – «Rýhanı qazyna – 2018» mádenıet jáne óner salasy uıymdary men qyzmetkerleriniń I respýblıkalyq festıvali atqarylǵan aýqymdy jobalardyń zańdy jalǵasy desek, qatelespeımiz. Osynaý tarıhymen, taǵylymymen, dástúr-salty, óreli ónerimen álemdi moıyndatqan aýqymdy jumystardyń tasasynda, árıne laıym ult ıgiligi jolynda ter tógip kele jatqan óner men mádenıet salasy qyzmetkerleriniń qyrýar eńbegi jatyr.
