– Osy sharadan keıin bizdiń óńirdegi velosport burynǵydan da qarqyndy damıdy degen oıdamyz. Atyraýlyqtar buqaralyq sportqa belsendi bet buryp keledi. Salamatty ómir saltyn nasıhattaýǵa arnalǵan sharalar legi únemi jańa jobalarmen tolyǵýda, – deıdi oblys ákiminiń birinshi orynbasary Saǵyndyq Luqpanov.
Olımpıada chempıony Aleksandr Vınokýrov: «Jarysqa qatysýshylar sany osynshalyq kóp bolady dep oılamadym», deıdi. Munaıly aımaqtyń jasy men kárisi qatar aǵylǵan velojarys shyn máninde sport merekesine aınaldy. Bes atalym boıynsha júlde sarapqa salyndy. Nátıjesinde, eń jasy úlken qatysýshy 66 jastaǵy Ǵımran Aqbotın, eń jas qatysýshy 4 jastaǵy Aııa Salamat dep tanyldy. Bısalıevter otbasy «Sportshylar otbasy» atalymyn jeńip aldy. Al eń kreatıvti velosıpedtiń ıesi Baqytjan Shaıhıev bolsa, Marat Naýryzǵalıev eń kreatıvti kıim ıesi atandy. Barlyq júldegerlerge syılyqqa velosıped berildi. Jeńimpazdardy marapattaý sharasynan keıin Sultan Beıbarys alańynda estrada ónerpazdarynyń qatysýymen merekelik konsert ótti.
Aıta keteıik, sharany uıymdastyrýshy «Atyraý oblysynyń sportty qoldaý jáne damytý» qoǵamdyq qory bıyl qurylǵanymen, biraz sharaǵa bastamashy bolyp úlgerdi. Qor bastamasymen eki jas fýtbolshy ataqty «Real» Madrıd komandasynyń jattyǵý lagerinde dáris alý múmkindigine ıe boldy. Velojarys aıasynda qaıyrymdylyq jármeńkesi men aýksıonnyń ótýi de sharanyń mańyzyn arttyra tústi. «Astana» velokomandasynyń baǵaly lottary satylymǵa shyǵaryldy, odan túsken aqshalaı qarajat olımpıadalyq rezervtegi balalar men jasóspirimder sport mektebiniń velosport bólimin sporttyq jabdyqtarmen qamtýǵa jumsalady. Velosport bóliminde 10 men 16 jas aralyǵyndaǵy 80-ge jýyq sportshy dáris alady», deıdi atalǵan qoǵamdyq qordyń ókili Tańat Nurshın.
Sonymen kópten kútken aýksıon da márege jetti. Eń qymbat lot «Vino Bike» velosıpedi – 10 mln 400 myń teńgege baǵalanyp, ony Qulsary qalasynan kelgen otbasy satyp aldy. Sondaı-aq olar ekinshi kolleksııalyq Argon – 18 velosıpedin 5 mln 400 myń teńgege aldy. Maık Taısonnyń qoltańbasy bar qolǵaptary 3 mln 200 myń teńgege baǵalansa, Roı Djonsonnyń qoltańbasy bar qolǵaptar 1 mln 200 myń teńge boldy. Qaıyrymdylyq aýksıonynda eki chempıonnyń qoltańbalary bar jeıdeler, sırek kezdesetin velosıpedter men eń iri eýropalyq velotýr ótetin Ispanııanyń Výelta qalasyna 3 kúndik týr oınatyldy. Aleksandr Vınokýrovtyń ózi Roı Djonsonnyń qoltańbasy bar qolǵaptardyń ıesi atandy. Qaıyrymdylyq sharasy kezinde 34,4 mıllıon teńge qarjy tústi. «Barlyq qarjy Atyraý oblysyndaǵy velosportty damytýǵa jumsalady», deıdi uıymdastyrýshylar.
Baqytgúl BABASh,
«Egemen Qazaqstan»
ATYRAÝ
