«Syn túzelmeı, min túzelmeıdi» deıdi halqymyz. Kemshilikti kórsetip, onyń joıylýyna atsalysý da azamattyq paryz. Jýyrda ǵana Taraz qalasynyń ákimi bolyp taǵaıyndalǵan Ǵalymjan Ábdiraıymov shahar kóshelerin aralap, birqatar kemshilikterdi ótkir synady. Máselen, qala kósheleriniń sánin ketirip turǵan jabaıy jarnamalar jaıyn aıtqan ákim tıisti mekeme basshylaryna atalǵan kemshilikti joıý jóninde tapsyrmalar berdi.
Qala kóshelerin aralaý barysynda ákim Abaı dańǵylynyń boıynda ornalasqan Jambyl Jabaev atyndaǵy №5 mektep-gımnazııanyń mańyndaǵy jasandy jol kedergisiniń jartysy joq ekenin de synady. Sonymen qatar jol boıyndaǵy tal-daraqtardyń birkelki áktelýi, sý qubyry júıeleriniń qaqpaǵy men jol belgileriniń ornatylýy da nazarǵa alyndy.
Qalanyń Abaı jáne Fýrmanov kósheleriniń qıylysynda kanal bar. Al osy kanaldyń boıyna ásirese jaz mezgilinde qoqys tolyp qalady. Ári-beri ótken turǵyndardyń qaldyqtardy osynda laqtyryp kete beretini de jasyryn emes. Ákimniń aıtýynsha, endigi jerde atalǵan kanal boıyna tazartý jumystaryn júrgizý únemi qadaǵalaýda bolady.
Taraz qalasyndaǵy eń iri saýda nysandarynyń birinen sanalatyn «Aýyl-Bereke» bazaryna baratyn joldyń da bul kúnde tozyǵy jetken. Sondaı-aq tar jolmen júrýdiń ózi qıyn. Árıne, bul másele de qala halqyn alańdatpaı qoımaıdy. Eger qala ákiminiń tıisti mekemelerge bergen tapsyrmasy júzege asatyn bolsa, bazarǵa aparatyn eski joldyń jańalanatyn kúni alys emes. Endi tıisti kásipkerlik qurylymdar qala joldarynyń mańyzdy bóligi sanalatyn joldy jóndeýge qulyq tanytsa bolǵany.
Taǵy bir aıta ketetin másele, búgingi tańda Taraz qalasynda irgetasy qalanǵan 14-shaǵyn aýdandy ystyq sýmen qamtamasyz etetin sý-qubyr júıeleri negizinen atalǵan «Aýyl-Bereke» bazarynyń mańynan ótedi. Biraq qomaqty qarajat ketken álgi qubyr jelisi durys ornatylmaǵan. Sonymen qatar bazar mańyndaǵy sý qoımasyna qoqys tastaýshylar sany da artýda. Bazardaǵy saýda oryndarynan, ondaǵy ashanalardan kún saıyn qyrýar qoqys shyǵady. Endi sý qoımasyna tastalǵan sol qoqystardan soń atalǵan qoımanyń jaıyn elestetýdiń ózi qıyn. Sondyqtan da bul máseleniń bir aıdyń ishinde sheshiletinin aıtty Ǵ.Ábdiraıymov.
«Ákim bol, halqyńa jaqyn bol» deıdi halyq. Kóne shaharda kókeıkesti másele árıne kóp. Endi sol máseleniń bári de retimen sheshimin tapsa, shahardyń sáýleti búgingiden de artyp, Tarazdyń totydaı taranyp, tuǵyrynan taımaıtyny anyq.
Hamıt ESAMAN,
«Egemen Qazaqstan»
Jambyl oblysy
