Kópshilikke qýanysh syılaǵan monýmentti aýyl turǵyndary óz qarajatyna turǵyzypty. Qarııalar bul bastamany týǵan jerge degen súıispenshilik, úlkenge qurmet ekenin aıtyp, rızashylyqtaryn bildirdi. Monýmentte el basyna kún týǵan shaqta aýylda aıanbaı eńbek etken jandardyń da esimderi jazylǵan. Saltanatty jıynda ıgi iske muryndyq bolǵan ekonomıka ǵylymdarynyń doktory Beıbit Syzdyqov kópshilikti ata-babalardyń esimi jazylǵan monýmenttiń negizgi mıssııasyn umytpaýǵa shaqyrdy. «Sheńgeldi aýylynyń tarıhy 300-350 jyl buryn bastaý alǵan. Bul ýaqyt aralyǵynda kóptegen ata-babalarymyz dúnıeden ozdy. О́kinishke qaraı, olardyń birin bilsek, birin bilmeımiz. Sondyqtan bul sońymyzdan erip kele jatqan jas urpaqqa ata-babalarymyzdyń esimderi qashalyp jazylǵan monýmentti mura etip qaldyrsaq degen izgi nıetpen jasalǵan dúnıe. Ata-babalarymyzdyń aty jazylǵan jádigerlerdi búldirmeı saqtap qalý – búgingi urpaqtyń negizgi mindeti», dedi B.Syzdyqov.
Sondaı-aq shaǵyn eldi mekenniń tarıhy jáne qan maıdanda beıbit zaman úshin jaýǵa qarsy turǵan aýyl azamattary týraly qundy maǵlumattar qamtylǵan «Týǵan jer tarıhy» atty kitap ta turǵyndarǵa tartý etildi.
Ǵalymjan ELShIBAI,
«Egemen Qazaqstan»
