Jaz boıy balalar halqymyzdyń mádenıeti men tilin, ónerin, salt-dástúri,turmysymen tanysady. Úıirmeler men sheberlik sabaqtarynda kıiz úıdi qurý, ulttyq áshekeıler men kádesyı jasaý, jún tútý, quraq qurý, túrli buıymdar toqýǵa jattyǵyp, at báıgesi, sadaq atý, asyq oınaý, toǵyzqumalaq syndy oıyndar, ulttyq taǵamdar ázirleýdi úırenedi. Oqýshylar elimizdiń, óńirdiń kıeli oryndaryna ekskýrsııa jasaıdy. Olardy tildik, týrıstik-ólketaný, etnomádenı, zııatkerlik, ekologııalyq, shyǵarmashylyq syndy túrli salalyq lagerler qarsy alady.
Oblystyq bilim berý basqarmasynyń málimetinshe, óńirde mektep oqýshylarynyń jazǵy demalysyn uıymdastyrý úshin oblystyq bıýdjetten 285,5 mıllıon teńge bólinipti. Aýdan-aýyldardaǵy lagerlerde 15 kúnge belgilengen saýyqtyrý oryndary úsh aýysym boıynsha jumys isteıdi. Jazǵy lagerlerge 1-10 synyptarda oqıtyn 97 myńnan astam oqýshy, mektep aldy lagerlerde 43 myńnan astam oqýshy demalady.
Basqarmanyń málimetinshe, qazirgi ýaqytta lagerlerde daıyndyq jumystary júrgizilýde. Olardyń balalardy qabyldaýǵa daıyndyǵyn óńirdegi Tótenshe jaǵdaılar departamenti jáne Qoǵamdyq densaýlyq saqtaý basqarmasynyń mamandary tekseredi. Jazǵy demalysty uıymdastyrýda ata-anasyz jetim balalar, áleýmettik jaǵynan az qamtamasyz etilgen otbasylardyń balalary oqytý qory esebinen qamtylady.
Farıda BYQAI,
«Egemen Qazaqstan»
