Kún raıynyń ár sátin tıimdi paıdalanyp qalýdy maqsat etken agroqurylymdar búginde en dalany qyzý eńbek dúbirine bólep júr. Aýyl sharýashylyǵy mamandary bergen aqparat boıynsha jaýapty naýqanǵa 13 myń traktor, 16 myńǵa jýyq tuqym sepkish agregattar, 1147 egis kesheni tartylǵan. Tuqym, janar-jaǵarmaı qory jetkilikti. 123 myń tonna mıneraldyq tyńaıtqysh alynǵan.
Jaýapty naýqanǵa jan-jaqty daıyndyqpen kiriskenderdiń biri– Mamlıýt aýdanynda ornalasqan Zápken Shaıahın jetekshilik etetin «Senim» JShS-i. Bıdaı-sulydan bólek 500 gektar zyǵyr, 100 gektar raps egýdi josparlap otyrmyz. «Boıavchanka», «Omby-35» sekildi teriskeıdiń klımatyna tózimdi tuqym suryptary jersindirilgen. Baǵymda ekijúzge jýyq qazaqtyń aqbas sıyrlary bolǵandyqtan, jemazyq kólemin de birshama ulǵaıttyq, deıdi bilikti basshy. Baqyt Mántaevtyń tehnıka tizgindep kele jatqanyna on jyldan asypty. «Versaıtlı 435» egis keshenin urshyqsha úıiredi. Kanadalyq zamanaýı tehnka kúnine 150-200 gektar alqapqa yrys dánin sebýge qaýqarly. Tań atqannan ymyrt úıirilgenge deıin bel jazbaıtyn mehanızatorlar úshin úsh mezgil ystyq as uıymdastyrylǵan.
Oblys ortalyǵynda ótken agrarshylardyń bas qosqan jıynynda «Atameken-Agro-Tımırıazevo» seriktestiginiń sandyq tehnologııalardy aýyl sharýashylyq salasyna qoldanýdaǵy tájirıbesi taratylǵan edi. «Agrojospar» baǵdarlamasynyń tıimdiligi óte zor. Buryndary agronomdar egistiktiń qurylymyn esepteýmen eki aıdaı aınalyssa, qazir birer aptanyń ishinde tap-tuınaqtaı etedi. Beınebaqylaý arqyly topyraqtyń quramyn, qunarlylyǵyn, alqapqa qansha mólsherde tuqym, gerbısıd sińirý qajettigin naqty bilemiz. Munyń ózi egistik jaǵdaıyna baqylaý jasaýǵa, barynsha mol ónim alýǵa múmkindik beredi, deıdi JShS dırektory Aıdarhan Eserkenov agrotehnologııalardyń artyqshylyqtary jaıly. «Baptaı bilseń jer jomart» qaǵıdasyn qatań ustanǵan «Aqjer 2010» sharýashylyǵy 15 myń gektar jerge ıelik etedi. Munda materıaldyq-tehnıkalyq bazany nyǵaıtýǵa kóńil bólinip, jarty mıllıard teńgege sońǵy úlgidegi egis keshenderi ákelingen. Astyq saqtaıtyn qoıma jańartylǵan. Kóktemgi dala jumystary ýaqytynda jumysshylardyń sany birjarym esege deıin artqan. Ortasha jalaqy 115 myń teńgeniń tóńireginde. Zyǵyr, raps, jasymyq sııaqty maıdy daqyldarǵa basymdyq berilgen. «Andreevka-SK» sharýa qojalyǵy da aýyspaly egis júıesin tıimdi paıdalanyp júr. Janar-jaǵarmaı, tuqym, mıneraldyq tyńaıtqysh qajette mólsherde ázirlenip, sońǵy eki jylda 300 mıllıon teńgege tehnıkalar satyp alynǵan. Qojalyq jetekshisi Seráli Sharıpovtyń aıtýynsha qarajattyń bir bóligi sýbsıdııalanatyndyqtan qaıtarý sonshalyqty qıyndyq týǵyzbaıdy. Egistik alqaptaryn 400 gektar raps, 1300 gektar zyǵyr, 2 myń gektar bıdaı quraıdy. Munyń syrtynda jemazyq daqyldary taǵy bar. Jaýapty naýqanǵa 50 mehanızator atsalysýda.
Soltústik Qazaqstan tájirıbe stansasynyń mamandary topyraqta ylǵaldyń jetkiliksizdigine nazar aýdarýǵa, vegetasııalyq sebý merzimin uzartyp almaýǵa keńes beredi. Olardyń aqylyna qulaq asqan Qyzyljar aýdanynyń dıqandary 16,5 myń gektar alqapqa ylǵal saqtaý, topyraqty óńdeý sharalaryn tyńǵylyqty júrgizip, 20 myń gektar jerge tyńaıtqysh sińirgen. Nóldik tehnologııany keńinen meńgerýdiń arqasynda iste kidiris sezilmeıdi. Aramshópter mentúrli zııankesterden qorǵaný joldary da oılastyrylǵan.
Atap ótýge bolatyn mańyzdy kórsetkishterdiń biri– bıyl maıly daqyldar kólemi 285 myń gektarǵa kóbeıtilip, 1 mıllıon gektarǵa jetkizilýi. Bul qadam bıýdjetke qosymsha 60-70 mıllıard teńge kiris ákeledi degen boljam bar.
О́mir ESQALI,
«Egemen Qazaqstan»
