Baýyrjan Súripkelov Jambyl aýdandyq ishki ister bóliminde kezekshiniń kómekshisi qyzmetin atqarady. Jumys ótili úsh jyl ǵana.
Oqıǵa bolǵan kúni dem alyp jatqan polısııa serjanty kórshi úıdiń qyzyl jalynǵa oranǵanyn baıqap qalyp, dereý syrtqa umtylady. Tıisti oryndarǵa habar berip, ózi kómekke asyǵady. Tájirıbesiniń azdyǵyna qaramastan ábjil qımyldap, otanasyn, 10 jastaǵy qyzyn jáne 4 jastaǵy ulyn úıden aman alyp shyǵady. Jedel kúsh kelgenshe kórshisi Vladımır Hramov ekeýi birlesip, órttiń ári qaraı órshimeýin qadaǵalaıdy.
Baýyrjannyń erligi jaıly habardy áriptesteri keıin estıdi. Oǵan deıin ózi tis jaryp úndemeıdi.
«Meniń ornymda bolsa, kez kelgen adam qol jaıyp, qarap turmas edi. Mundaı qysylshań sátte kómek berý – bárimizdiń azamattyq borshymyz», deıdi polısııa serjanty.
О́mir ESQALI,
«Egemen Qazaqstan»
